حلا

مش عارفة كيف مرات بتصيبني حالة من الصمت وبتطلع  وين انا ووين صرت وكيف كل هالايام مرت بسرعة بس لا زالت لحظات موجودة كأنها مبارح .. مناسبة هالحكي أخوي الصغير وبنظري هو ما زال أخوي الصغير اللي صحيح كنا دايما نتطاوش ونرمي شباشب ورا بعض هههههههههه بس اكتر انسان جد قريب مني وهو اكتر واحد من اخواني اللي جد عشت معه وكنا نروح عالمدرسة مع بعض وكلهم يطلعوا ويتركونا عشان ندير بالنا علي ستي الله يرحمها. بدي كتب لاحكي عن المواقف والذكريات والضحك والتخويت .. حبيبي أكثم الله أنعم عليه بوردة.. بحاول ما اتفرج على صورتها وانا برة البيت عشان ما أبكي، الله يحميكي ويحفظك لابوكي وامك حبيبتي حلا ..... وجد اني مش قادرة استنى عشان احملك وابوسك يا عمتو

اللهم صلي علي سيدنا محمد

والله مشتــــــــاقة لطــــــلابــــي

جد مفكرة زيارتي الجاي لعمان انه أروح وأزورهم ... بعضهم رح يتشاهد بس يشوفني هههههه خاصة الاولاد ... كنت شديدة بالصف لكن برة كنت اكون مرحة معهم

قد ما التدريس صعب بشتاقله

1

ما عمري اجيب بسة ولا كلب

طول عمري نفسي اربي بسة بس امي ما بتحبهم وكانت تضل تحكيلي بس تتزوجي بتجيبي وحدة في بيتك !! تزوجت واحد بموت من البسس وأي حيوانات بالبيت !!المهم حاولت اكتر من مرة اقنعه بس جد بكرههم !! من فترة وحدة صاحبتي سافرت وطلبت مني ادير بالي على بستها انا طبعا كيّفت وخاصة زوجي مسافر بشغل !! يلا بجرب كيف يكون في بسة بالبيت 

البس طلع أهبل ومعاق هههههههه !! بخاف !! اول ما جابته ما يطلع من تحت الطاولة ودايما يتخبى وراء الكنباي  .... واول ما افتح باب البيت يتخبى ! ولا لما ييجي عندي ضيوف !! ما ببيّن

حكيت حرام شكله مستفقدها !! صرت هيك أعوده علي والاعبه !! شكله أخد وجه زيادة !! صرت بس انام بالغرفة واسكر الباب يصير يموّي ويحاول بده يدخل عالغرفة !!!! وانا لحالي بالبيت !! ما ضل فيه عقل !! وعندي شغل تاني يوم !!! طلعت بحكيله وبعدين معك شو اللي بدك اياه !! وخبطته شلوط

ههههههههههههههههههه بعديها حرّم

 

بتلاقي بركض من مكان لمكان !! او بنط على الشباك العالي !! اول مرة بشوف بس مشطوب هيك

 

لهيك صرت اكون كويسة معه خلال اليوم بس بالليل اطنشه أو أخوفه مني .... بس رجعت حكيتلها يمكن صار عنده انفصام بالشخصية

 

 



 

 

اللي طلعته من هالتجربة وبعد التنظيف وراه كل يوم والعناية  والاهتمام اللي بده اياها !! تحسه طفل ....... مش ممكن في حياتي افكر أجيب لا بسة ولا كلب !! خليهم حلوين من بعيد لبعيد





ليش هدية الأخ ما في أروع منها ؟؟!!؟

حكيت من قبل انه ما الي كتير بالتكنولوجيا وخاصة التلفونات يعني كل تلفون بيجيني بضل معي 3 سنين أقل شيء ... مش عارفة شكلي بستخسر ادفع فلوس في هيك اشياء  وسبحان الله من اول ما بلشت استخدم تلفونات وانا دايما يصحولي هدايا  اول تلفون انا دفعت نصف سعره وأخوي محمد الله يسعده كمل عليه  وتاني تلفون بعتلي اياه أكثم حبيب قلبي  والتلفون اللي كان معي كمان اعطاني اياه أخوي أوس ..... الي بستخدمه 3 سنين وجد انه رائع وما ماله اشي  ..... لكن شغله المسجات من امريكا للبلاد العربية مشكلة المهم كنت بفكر أجيب الاي فون بس شكله  فترة التفكير طوّلت  ..... ما شفت الا اخوي اوس باعتلي تلفونه الآي فون مع بنت عمي اللي راحت زيارة على عمان (طبعا مع معسل ولبن جميد) ههههه !! المفروض انا اللي ابعتلهم تلفونات !! المهم يعني صدقا هدية متل هيك من الأخ كمان والله بتسوى مليون دينار وجد شو مبسوطة عليه !!!بعرف الزوج ممكن يجيب لزوجته هدية بس ما بعرف هو بحالتي انا ولا الكل هيك بس بتحسهم انه يعني هايني جبتلك هدية تذكري وتطلبيش اشي من هون لسنة هههههه

بس هدية الأخ ولا أروع !

الله يسعدهم !

الله يحبّب فيكي كل أمة محمد

من اسبوع تقريبا كنت معزومة على عيد ميلاد ناس بعرفوهم دار حماي .....كانت جمعتهم حلوة وولاد صغار وعجقة ! تذكرت جمعاتنا وكيف لما اخواني يتجمعوا عند امي وأبوي ! ما علينا .... قاعدين ومعمرين الأرجيلة ولا أهلي بتصلوا فيه ! عادي الله يسعدهم دايما بتصلوا ...انا سحبت حالي وطلعت أحكي معهم ! الحمد لله كويسين ! وصيتهم يبعتولي لبن جميد ومعسل وقهوة مع ناس جايين من عمان ! يعني كالعادة ما بنتغير ! اجا الدور أحكي مع امي ! دايما بحكي معها يعني ما في مشكلة بس ما بعرف ليش بس حكتلي الله يحبب فيكي كل أمة محمد - دايما بتحكيلنا اياها كلنا- هيك خنّقت وكان نفسي أبكي !!بحكيلها يما هسه ادعي كل الناس يحبوني انا مش عند أمة محمد بس هههههه وبحكي وانا ماسكة حالي جد مش عارفة ليش !! كله من مزاج اف ام ! طول الليل و النهار حاطين أغاني للأم !! ضلّت تدعيلي زي دايما وانا بس بدي أنهي المكالمة عشان ما أفقد أعصابي وانا بحكي معها ! لانه والله ما اشي بقنعها انه ما في اشي واني بس نفسي احط راسي على ركبتها !! ودعتها ودمعت شوي بس الناس والعيلة كلها موجودة ! ضليت أكابر على حالي لحتى طلعت بالسيارة مع بنت حماي وبعدها انفجرت بكى ! الله يسعدك يا امي وأشوفك على خير قريبا 

أسئلة عمرها ما خطرت على البال

بصراحة بعتبر اللي متربيين وعايشين في البلاد العربية محظوظين من الناحية الروحانية والدينية ! لانه بكون الدين دخل في كل شيء صغير وكبير في حياتنا أو هدا اللي صار معي .... وبنعتبر كتير أشياء من المسلمات !! يعني بدون ما نسأل حالنا ليش هيك ! مرات حلو نفكر ونسأل حالنا ليش وكيف لكن أنا بعتبر انه مرحلة التسليم الكامل لأمر ربنا نعمة ! صحيح أخذ شيء عن قناعة أفضل لكن التسليم أريح للبال !! ليش بحكي هيك ! لانه اللي عايشين بالبلاد الغربية بتحسهم بدققوا وبدهم تفسير لكل صغيرة وكبيرة حتى مرات مع انه بكون أسألتهم منطقية لكن لو احنا حتى فكرنا فيها بنوقف للحظة بعدين بنحسها كفر وبنصير نستغفر ربنا ! 

في كتير جلسات مع عائلات نتطرق لمواضيع في الدين وعن جد يسألوا أسئلة ما عمرها خطرت على البال أو أمور ما سألنا نفسنا ليش وكيف ! وبما اني جاي طازة من البلاد العربية كتير مرات بوجهوا الأسئلة الي ! انا بعتبر نفسي أو بتمنى أكون متدينة بس جد مرات ما بعرف شو أجاوب !!! بعض هاي الأسئلة أو النقاشات

انه هل الرسل قبل سيدنا محمد كانوا يصلوا ويصوموا مثلنا ؟!! انا كان جوابي لأ لانه الصلاة نزلت على سيدنا محمد عليه السلام ! طيب كيف كانت طبيعة عبادتهم ؟؟

شرب الخمرة !! انه لو بس الواحد لو شرب شوي صغيرة وما سكر !! جوابي طبعا انه لأ حرام ! ما أسكر قليله فكثيره حرام !! طيب ليش ؟؟ السيء في الخمرة انه الانسان يفقد عقله وانه ما بنشرب لدرجة السكرة  !! انا طبعا جوابي حتى ولو حرام يعني حرام

الحجاب ! بحاولوا بأي طريقة يقنعوك انه الحجاب مش واجب لانه ما في آية تنص على الحجاب وانه كلام الرسول عليه السلام مش قوي مثل اللي ورد في القرآن .... استغفر الله العظيم ولما أذكر الآية 31 من سورة النور

وَقُلْ لِلْمُؤْمِنَاتِ يَغْضُضْنَ "

مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ 

زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ 

عَلَى جُيُوبِهِنَّ وَلَا يُبْدِينَ زِينَتَهُنَّ إِلَّا لِبُعُولَتِهِنَّ 

أَوْ آبَائِهِنَّ أَوْ آبَاءِ بُعُولَتِهِنَّ أَوْ أَبْنَائِهِنَّ أَوْ 

أَبْنَاءِ بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ 

أَوْ بَنِي أَخَوَاتِهِنَّ أَوْ نِسَائِهِنَّ أَوْ مَا مَلَكَتْ 

أَيْمَانُهُنَّ أَوِ التَّابِعِينَ غَيْرِ أُولِي الْإِرْبَةِ مِنَ 

الرِّجَالِ أَوِ الطِّفْلِ الَّذِينَ لَمْ يَظْهَرُوا عَلَى عَوْرَاتِ 

النِّسَاءِ وَلَا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ 

مِنْ زِينَتِهِنَّ وَتُوبُوا إِلَى اللَّهِ جَمِيعًا أَيُّهَا 

الْمُؤْمِنُونَ لَعَلَّكُمْ تُفْلِحُونَ"

بكون الرد انه الآية فقط لنساء النبي عليه الصلاة والسلام وحتى لو للمسلمات انه فقط عدم التعري وانه الحجاب كغطاءللرأس غير ضروري والحكمة من الحجاب انه المرأة ما تلفت الانتباه لكن بالغرب بالعكس الحجاب ملفت للانتباه أكثر من لو انت مش محجبة

موضوع المرأة لما تتطلق أو يموت زوجها انه ليش لازم ما تطلع من البيت أو تتزوج الا بعد فترة معينة ... انا بصراحة كمان ما بعرف السبب ... حاولت أبحث على النت لكن ما حسيت بشيء مقنع وانه بصراحة بأمور الدين ما بثق بالنت كتير

يمكن انا كمان لازم اطور اسلوبي بالاقناع وأقرأ أكتر في الدين لانه مثل ما حكيت احنا تربينا على الاقتناع والتسليم لأمر الله عز وجل لكن حلو نعرف نقنع الناس بأرائنا ! انا ما بحاول اكون عصبية أو احكي بلا هالحكي الفاضي ولا اسكت احسنلك ! ههههه لانه حلو كمان تقنع الناس بوجهة نظرك

صحيح مع انه السنة قربت تخلص بس كل سنة والجميع بخير وانشاء الله تكون سنة طيبة للجميع

تعرية الصدور

شبابنا العرب يعرون صدورهم امام الرصاص دفاعا عن الحقوق وبحثا عن الحرية وشابات تعرين بالرغم عن انوفهن بايادي الانظمة الفاسدة وهن يطالبن بتحرير المجتمع القمعي الذي لا يفرق بين رجل وامرأة .... كل الاحترام والتقدير لهذا التعري !! أما الموجة الجديدة بين فتيات لا ادري هل نطلق عليهن اسم عربيات أم لا ولكنهن اخترن هذا التوقيت ليتعرين على صفحات مجلات عالمية ولا زلت لا أفهم السبب !! بعد ان أثبتنا للعالم بأننا متعلمون ونطالب بحقوقنا بالطرق السلمية نرى مثل هذه الأمثلة المخزية والتي حسبت علينا بداعي حرية ابداء الرأي  والمساواة .... لا حول ولا قوة الا بالله العلي العظيم

2011 ... عام الموت والفتن أم عام الأمل والحياة

عشت من العمر ما عشت ولكن لم أعهد عاما كهذا العام ! لا أدري هل نشعر بالفرح والفخر أم بالغصة والألم ! رفعنا راسنا أخيرا لنطالب بحريتنا التي لطالما كانت أمنية وحلم بعيد المنال .... أمل بأن نتنشق الهواء بدون ضيق وننظر الى السماء وكأن لا حدود لها .... أخيرا هناك بصيص أمل .... جاء ممن اعتقدنا انهم انقرضوا وانصهروا مع الانحلال الأخلاقي والاحباط المستمر الذي ذقناه مذ يوم خلقنا .... جيل كان يكبر واعيا لما يدور حوله بالرغم من محاولات غسل الدماغ وكسر العزائم التي كانت مستمرة من الداخل والخارج !! شباب يفخر بهم التاريخ ويسجلون المستقبل بدمائهم .... أعادوا لنا الأمل بالحياة والشعور بالفخر والاعتزاز  ..... ما لم نتوقعه هو قوة القبضة البائسة والعفنة والتي ستحاول اعادتنا الى الجحيم من جديد لم نتوقع بأن تكون بهذه القسوة والجبروت !

بالرغم من القتل والتعذيب الا ان خيار العودة الى الوراء لم يعد مقبولا ....لا نريد الا الحرية ولن نسكت عنها ... دعونا ننعم بها .... دعونا وشأننا 


 اذن هو عام الأمل برغم العذاب والدماء.... لا أظن ان أحدا ينكر ذلك .... حماك الله يا بلاد العرب ورحم موتاك وجعلهم شهداء مع الصدّيقين ... وأخذ بيد شبابك الطاهر واللهم خذ أعداء الأمة والحرية أخذ عزيز مقتدر يا أرحم الراحمين


لنرجو بأن يكون العام المقبل عام قطف ثمار الحرية 

ليش يا جيش ؟؟

وقف مع الشباب وقت الثورة عشان يذبحهم ويهينهم بعد الثورة ؟؟!!! والله اللي بنشوفه بصير بمصر أوسخ وألعن منأيام مبارك !! هيك تكون الذكرى الأولى للثورة ؟؟

 اخص يا جيش .... وحسبنا الله ونعم الوكيل

عيد من الآخر

صارلي تقريبا شهر واصلة من عمان ! ومن هناك عرفت انه ما رح نرجع على تكساس ! رح ننقل ولاية تانية حسب شغل زوجي ! لكن اللي ما كنت أعرفه وعرفته قبل ما آجي انه رح نعيش في فلوريدا قريب من بيت حماي ومعظم أهل زوجي ! يعني بصراحة انا فرحت وانغصيت بنفس الوقت ! انه لو سافر وراح واجا بكون في ناس حولي وصعب انه يتركني زي آخر مرة وكمان التنقل مش كتير حلو وانه في ونس حولي بس انا جد طبيعتي بحب اشتاق ههههه يعني ابعد تحلى وبصريح العبارة ما بحب الاحتكاك الكتير مع العالم مين ما كان يكون ! وما شاء الله كلهم قراب على بعض يعني تحس حالك في حارة من حواري عمان والحمد لله 

المهم انا نقلت على بيتي بس الأحد من الاسبوع الماضي وبين بلشة التنقيل والزيارات جد مش مجمعة بالمرة  ..... يوم الثلاثاء بالليل ما بعرف شو اجا على بالي اشوف الفيس بوك قبل ما أروح أنام ولا بنت أختي كاتبة انا لله وانا اليه راجعون ... طبعا انا شوية العقل اللي كانو عندي تبخروا ! رادة عليها صاحبة الها مين من غير شر؟؟بتحكيلها خالة ماما ! طبعا خالة مامتها يعني خالتي وانا هاتي يا عياط !! وأتصل على أختي على طول ! شو اللي صاير مالها خالتي ؟؟ بتحكيلي ما مالها اشي تعبانة شوي وامي عندها ! بحكيلها لأ ماتت !!! وأختي بتحكيلي لأ ما ماتت !!؟؟ بس هاي لانا بتحكي انها ميتة !! طلعت هي المسكينة لسة مش واصلها الخبر كانت الساعة 6 الصبح عندهم ! وليليتها ما سكتت عياط مع انه خالتي من أول ما وعيت على الدنيا وهي في السرير وآخر فترة تعبت بس خلص ما بهون على الانسان شو ما كان ! الله يرحمها ويدخلها فسيح جناته

خبر مثل هيك بنكتب على الفيسبوك ؟

 طبعا يوم الأربعاء اجو بنات حماي وحماتي يعزوني وحماي ما قدر ييجي لانه كان تعبان وانبسطت انهم اجو وحتى حماي حكى معي وعزاني واعتذر لانه ما اجى وانا نوعيتي ما بلوم أي انسان على أي شيء .... المهم تاني يوم واللي هو الخميس ... كل هدا الاسبوع الماضي ! آ يوم الخميس اجت عندي بنت حماي بدها تشرب فنجان قهوة الصبح وبتحكيلي اذا بتحبي تطلعي ! انا عندي كتير ترتيب وشغل بس الحمد لله اللي طلعت معها يومها ! لفلفنا شوي وجبت أكمن شغلة ناقصة ومرينا على الصيدلية ولا زوجي ومعه والده بالصدفة شفناهم هناك !سلمنا عليه وطلب مني أجيبله بزر عين شمس وعزاني كمان مرة بخالتي وكان ما شاء الله عليه بضحك ما ماله اشي !! شوي صغيرة بدها تروح تجيب أولادها من المدرسة اجانا تلفون انه حماي أغمي عليه وأخدوه على المستشفى ! ما خفنا كتير لانه اله فترة تعبان وكتير بغمى عليه وهوقلبه كتير ضعيف ! نسيت موضوع ولادها وضلينا رايحين على المستشفى وهي تعيط وانا أحاول أهدي فيها بس جد طلعت فاشلة في هيك مواقف 

جبنا حماتي وضلينا رايحين عالمستشفى وطلبنا نشوفه وبس وصلنا بنسأل الممرضة عنه سكتت وحكت لحظة بس ييجي الدكتور ! احنا حسينا في اشي غلط ! بعدها شفنا زوجي وحكالنا انه حماي توفى !بلّمت وبلشوا يعيطوا !بكيت الا لما شفته ! انه بس من ساعة شفته بحكي وبضحك وهلأ هيك جثة ما بتتحرك ! ما قدرت أقاوم ! لما صحوا على حالهم وصاروا يحكو بالدفن أكيداحنا مش بالأردن اليوم مات بكرة على صلاة الظهر يوم الجمعة الدفن لأ ! في مراسيم الدفن وأولويات وما بعرف شو !!! جد لحظتها دعيت أنه بس أموت أكون بالأردن أو بفلسطين أو أكيد السعودية!! يمكن كان التأخير لصالح بناته لانهم اجوا من ولايات تانية 

الدفن كان يوم السبت لكن كلهم كانوا موجودين يوم الجمعة ....اقترحت على سلفتي نعمل أكل للجميع في بيتي ... كان شكلنا بضحك واحنا معجوقين وبسرعة بدنا نخلص وما شاء الله على رأي جارنا أكل لجيش بس الحمد لله طلع زاكي 

يوم الدفن اللي هو كان وقفة عرفة وهدا شيء أول مرة بحياتي بعمله انه رحنا كلنا على المسجد نصلي صلاة الميت وأول مرة بحياتي بصليها وبعدين رحنا كمان على المقبرة وشفنا الدفن ! بالأردن من المستحيلات النساء يعملوا هيك وأنا بتمنى اني ما أعملها مرة تانية !! بيت العزا للرجال كان في بيتي وللنساء كان عند أخو زوجي ! أيام ما بتمنى تنعاد أبدا ! كل ما يهدوا شوي يرجعوا يتذكروا ويصيروا يعيطو !! الموت صعب عن جد !!! بس كل اللي كنت أدعيه وأتمناه انه الله يرحمه ويعطينا حسن الخاتمة 

 انا لله وانا اله راجعون

صدقا بس مبارح واليوم رقت في بيتي وهديت أعصابي 

وكل عام وأنتم خير

مواقف 8

المفروض بكرة اغادر عمان لاميركا لكن الوالدة تعرضت لحادث بسيط أواخر أكمن يوم في رمضان .... الحمد لله رضوض بسيطة لكنها محتاجة راحة وامي من النوع اللي دايما تتحرك وتشتغل بالبيت ! مع انها مش صغيرة بالعمر وحتى لو حد بساعدها بتطلّع شغل من أي مكان ..... المهم بما انه ما في عند أهلي شغالة هالفترة وحسيت جد نفسيتها تعبانة انها ما بتتحرك كتير وما بتعمل اشي لذلك قررت اني أمد اجازتي كمان شهر ! يعني شهر بس رح أكون امسح وأجلي وأشطف ههههههه مع انه الشهرين اللي مضوا لم يخلوا الأمر من هالقصص هههه .. بصراحة اشتقت لبيتي ولمملكتي الخاصة وزوجي وهالشهر رح يكون شوي ملل لانه الكل تقريبا سافروا وبرجع روتين حياة الشغل  للجميع .... بس المهم بالموضوع امي تقوم بالسلامة و الله يحميها ويعطيها طولت العمر 

من زمان ما عملنا كعك العيد ! السنة اقترحت على اخواتي اللي كمان متغربات وكل وحدة الها بيت انه نلتم عند أهلي ونعمل كعك مع بعض وبنوزعهم علينا! وبالفعل عملنا تقريبا عشرة كيلو هههههه واشتغلنا فيهم من الساعة وحدة بالليل للساعة سبعةالصبح ! بس جد طلعو بشهّو!!!! ما صمدوا لثالث يوم العيد ! حتى حصتي اللي شالولي اياها آخدها معي اتاكلت ههههه الفكرة والله كانت باللمة ! بس طلعت لمة بتجنن 

وكعك بجنن كمان

مرة كان عندي موعد عند دكتور الأسنان وكنت مستعجلة ! مرّيت على كازية أعبي بنزين ووقفت سيارة كمان وكان فيها شاب ! المهم انا خلصت ومشيت بالسيارة ! شوي ولا حد بزمرلي انه وقفي !! انا طبعا نشف دمي! فكرت في اشي بالسيارة !!! المهم زي الهبلة صفيت على جنب وكان الشباك اللي بجانبي نصه مفتوح! اجا الشاب وبكل برود أعصاب بحكيلي متأسف بس شبهت عليكي وحدة درست معي في الجامعة الأردنية !! ههههه حكيت في بالي أهللللللا!! رديت لأ يا أخي غلطان أنا أصلا ما درست بالأردنية كلها !! طبعا هو مدخل نص راسه من الشباك وماسك فيه كمان ! حكيتله ممكن لو سمحت !! بحكيلي طيب وين درستي ؟ وافتحي الشباك شوي خلينا نتفاهم !!!! شو نتفاهم ؟؟؟ انا جد خفت !!! يعني عمري 31 سنة وعمري ما تعرضت لهيك موقف !!! ومش اني ملكة جمال !! يعني بنت عادية متلي متل كل البنات !! والأدهى بالموضوع انه الدنيا رمضان !! حكيتله شيل ايدك عن الشباك لو سمحت ومشيت !! صار يحكيلي طيب بليز بليز رقم تلفونك !! انا ضليتني ماشية بالسيارة وحكيت الله لا يرده اجره تحت العجل ولا راسه معلق بالسيارة المهم ضليت ماشية وجد خايفة ! لوهلة حكيت معقول بده يسرق شنتتي لانها كانت على الكرسي اللي بجانبي !! مشيت شوي بالسيارة ولا هو بلحق وراي لسة !!!!! والحلو بالموضوع انه ماسك ورقة صغيرة شكله كانت عليها رقم موبايله انه بده يرميلي اياها ههههههههههههههههههههههه آخ !!!! الدنيا أزمة وصايمين العالم طيب شو أعمل ؟!!! ضليت أأسرع وأحاول أضيعه ووقف مرة تانية عالاشارة ! تطلعت عليه بأشرلي بالورقة !!! وأنا بحكي لا حول ولا قوة الا بالله وبحرك براسي ! مش عارفة شكله استوعب انه استحي على دمك وبعدها ما شفته وراي ! بحكي لأخوي هيك صار معي بحكيلي لونك أعطيتيه رقمي بس ههههههههه صح والله كان لازم هيك عملت

مرة انعزمنا عند دار خالي وكان في صبايا صغار ! طبعا بالنسبة الي هسه صبايا صغار يعني أقل من العشرين ومنهم بنات اخواتي ! كانوا حابين يطلعوا ياكلوا آيس كريم بعد الافطار! ومتى تذكروا ! الساعة 11 بالليل وطبعا بما انه الأمور عنا مش سايبة وين يختي انت وياها ؟؟!! بس يقنعوا فيهم وما بنتأخر وما بعرف شو ! ومنهم وحدة جايبة سيارة جديد وحابة تطلع فيها بس امها مش مأمنة عليها ! .... بعد نقاش ولأ وآ ليش يا اسمى ما تروحي معهم ! بما اني كبيرة وبأمنوا عليهم معي ! انا حكيت أوكي بيبي سيتر مش مشكلة المهم آكل ايس كريم كمان ههههه ومع ذلك طلعوا معنا شباب وبصراحة أحسن ! المهم رحنا أكلنا وانبسطنا ! مع انهم كلهم صغار لكن حلوين ! لما روحنا طلعت مع الصبية اللي جايبة السيارة جديد وبتدرب عليها وكانو معي بنات اخواتي  .... حطوا على أغنية كنت كتير أسمعها بأمريكا بس ما أعرف المغني ولا متذكرة اسم الأغنية بس بحكولي هاي الأغنية اهداء منا الك يا خالتو وصارو يغنولي اياها بالسيارة ! اسمها جست ذي واي يو أر كانت لحظة رح أتذكرها طول عمري وجد كنت رح أبكي !! جد مأزكاهم !!!! يعني ديرة بالي عليهم وانه كنت دايما بيبي سيتر الهم ما راحت عالفاضي هههه ومن يومها صارت من أغانيه المفضلة

7 مواقف

  اولا رمضان كريم على الجميع مع انها متأخرة شوي الله يتقبل منا أجمعين بس الاشي الوحيد اللي ناقص في رمضان السنة هي سيري ! مين سيري ؟ هي مدبرة المنزل اللي كانت عنا الله يسهل عليها ! عن جد رمضان كان أحلى بوجودها ههههه الآن ربع الوقت في رمضان بس بالمطبخ !!!!! جلي وشطف وتضييف !!! وهسة صايرين أغلى من الذهب يعني بس يفكروا أهلي يجيبوا وحدة تانية بدهم يكتوا 4 آلاف دينار !!!!!؟ لانه الأردن على القائمة السوداء بالنسبة للشغالات هههه

طبعا بما انه كلنا مغتربين وما في شغلة ولا عملة ! دائما بنتسحر وبنصلي الصبح وبنام ! بس أبوي الله يطول عمره ما بتروح عليه صلاة الفجر أبدا رمضان ولا مش رمضان ! ولازم يصلي بالمسجد ! المهم من يومين كنا صاحيين وساعته ما رنت وأذن الفجر ! تطلعت عليه وهو نايم ومستغرق في النوم !! بس ما بعرف ما حبيت أصحيه !حسيته جد تعبان وما صدق ينام من صوتنا ! مش حجة بس خلص خليته نايم ! تاني يوم راجعني بحكيلي يابا مش انتو بتضلوا صاحيين ؟ ليش ما صحتيني على الصلاة وطبعا ما كذبت عليه وحكيتله الحقيقة ! كان جد زعلان بس وعدته انه ما اعيدها مرة تانية لاني حسيته فقد اشي في هداك اليوم !! وانا راحت عليه دعاء من أدعيته في المسجد !! الله يعطيه الصحة والعافية ويطول بعمره

كالعادة ما بتابع اشي برمضان غير انه كل البرامج والمسلسلات مكررة وأسخف من بعضها جد مين عنده وقت يتابع اشي ؟؟!!! بس الشيء الوحيد اللي كان نفسي أحضره هو مسلسل الحسن والحسين ! ما بعرف شو المأخذ على المسلسل بس عندي فضول أحضره ! طبعا ما بعرف وين بيجي وأي ساعة وكمان لو بعرف ما عندي وقت !! بتمنى الاقيه على سي دي آخده معي بس أسافر اتابع بعدين على رواق

لمن بدي اطلع مشوار بده ربع ساعة لازم أحسب حساب بدي تقريبا ساعتين أو ممكن أكتر غير انه بيتنا بعيد .... الأزمة الخانقة في عمان !! من يومين كنت مروحة من طبربور لليادودة وجد بالطريق طلعت روحي !! وكنت بستغفر وأختي بتسمع اذاعة مزاج ! وفي مسابقة على الاذاعة وما بعرف شو اجا على بالي اتصل واشارك معهم ههههه واتصلت وشاركت معهم وكان حوار لطيف .... اول مرة بحياتي بحكي مع اذاعة او تلفزيون بس عشان تشوفوا الأزمة في عمان شو بتعمل ههههه

من الآن بلشت أحسب كم كيلو قهوة وكم كيلو بقلاوة بدي آخد معي لأهل زوجي وما بدهم الا من انواع معينة !!! الله يستر من  الوزن

بدون فزلكة وكأنه الي زمان برة بس جد صرت أخاف أسوق في عمان ! ما لحقت أنسى كيف الناس بتكون تطاوش مطاوشة في السواقة بس هسة اذا في حد ممكن يوصلني ما بقول لأ أبدا

طول عمري نفسي يكون عندي بسة مرتبة ! مرة ربيت بسة شوارع هههه سميتها فرهود ههههه لكن بسة مرتبة كان نفسي أجيبها وأربيها وأدير بالي عليها وحكيت بأمريكا الناس بربوا حيوانات بالبيت وأكيد رح تكون الفكرة متقبلة أكتر ... خاصة كمان انه امي بتكره البسبب وطول عمرها تحكيلي في بيتك ان شاء الله بتربي قرود ما الي دخل وحكيت يلا بجيب عندي قطقوطة صغيرة بس للأسف زوجي بكره الحيوانات بالبيت  !!! ومستحيل يرضى أجيب بسة .... قبل ما اوصل عمان حكالي أخوي بده يجيب بسة صغيرة ! حكيتله مستحيل امي ترضى بس شكله للأسف حطها أمام الأمر الواقع وجابها !! طبعا هي بتجنن ومسلية بس ما بتعرف عليها الا بالليل ! كيفك يا حبيبتي يا كرموشتي يا بوشكا ؟!! وبس !! مين بطعميها وبحممها وبنظف وراها ؟؟! محسوبتكم !! وامي طول نهارها تشكي منها !! يعني بعد هالتجربة ومع انها كتير أمورة بس مسسسسسسسستتتتحيل أفكر أجيب عندي بسة عالبيت

كل ما بحكي معي زوجي بحكيلي ما زهقتي ؟ ما بدك ترجعي ؟ هو حكالي انه بس توصلي بتصيري بدك ترجعي بعد اسبوع ! مش شغلة زهق ومبسوطة مع أهلي ومع الجميع واللمات والكنافة ههههه لكن اشتقت لبيتي وروتين حياتي وزوجي

قصتي مع المعاكسات

بتذكر اول معاكسة تعرضت الها(ما بعرف تسمى معاكسة ولا تحرش) .... كان عمري ١٧ سنة وكنت باخد درس انجليزي في مركز جهة المستشفى التخصصي ! وفي هناك جسر مشاة صح ?!! المهم اختي كانت تستناني على جهة الجسر التانية ... وانا ماشية كان شابين جايين بالجهة المعاكسة .... يعني بس انا طلعت همه نزلوا ! وقتها واحد منهم حط ايده على جنبي .... انا تشنجت مكاني من الصدمة بس هو ضل رايح بسرعة .... كان جد جاي على بالي اعيط !! ومن يومها وانا عندي فوبيا من جسورالمشاة ! والله اني صرت استنى اي حد على الجسر حتى ينزل مشان انا امشي عالجسر ! او   اقطع الشارع عادي ...او بضلني اتلفت وانا عالجسر  مرة واحد برضه على جسر المشاة ماشي وراي و ببرطم انا وقفت وجحرته و حكيتله اتفضل امشي ههههه وبعدين انا مشيت


  وبلشت من وقتها عذابالمعاكسات ومرات بس البحلقة ! مع اني يا جماعة عادية جدا يعني مش خارقة الجمال ! بس الاشي الوحيد اللي كانت المعاكسات تتمحور حولها هو طولي هههههه يعني جملة يابايييي اطول من يوم الجمعة سمعتها الف مرة بحياتي ههههه ومرة واحد حكالي اطول من يوم السبت ! ومرة برضه واحد حقير حكالي تعليق جد شو كان وقح ! بلمت نص ساعة حتى افسر معناه بس لا شعوريا صرت اضحك (بدون ما يشوفني طبعا) .... في ايش يا حلو ... وينعن عمري انا ههههه بفكروا حالهم خفيفين دم بس حد شغلة بتنرفز وبتحسس بعدم الامان انه في حد مراقبك او ماشي وراك

 عذاب المعاكسات اكتر شيء كان الفترة ايام التوجيهي وسنة درست فيها في كلية ... كان لازم اخد مواصلات وسرافيس وشباب تحسهم بدهم يفعصوك بالسرفيس جد قرف .... بعدين والحمد لله نقلت على جامعة خاصة الباص كان ييجيني على باب البيت ويروحني كمان وكل ما كبرت صرت اقوى يعني اذا حد عاكس بصحله جحرة او احترم حالك ومن هالحكي بس للاسف معظم الايام الافضل انه ما ارد لانه انسان وقح ممكن يقل ادبه بطريقة البنت المحترمة جد ما تعرف شو تعمل وقتها 

وعلى فكرة لاحظت انه الشب اللي بكون لوحده ما

بعاكس لكن مع مجموعة بتحسهم بشجعوا بعض

ما بعرف هدا الموضوع اله دخل ولا لا بس على البلوج عندي مرة ذكرت اني فلاحة ... واحد ترك تعليق انه 


لو كان **** فلاح كان قطعته 

:S

برضه يومها بلمت وبتيجينا مرات حالة لوم النفس انه هل انا لابسة غلط او ضحكت او حكيت بصوت عالي وهون رجعت قرات الموضوع انه كتبت اشي غلط ? بس وقتها تركت تعليق من كتر ما كنت مجلوطة ويمكن انا غلطت اني سبيت على عيلته المفروض اسب عليه لحاله انه هو الواطي ... ومن يومها بتركلي تعليقات مقرفة من كل الاشكال والالوان اشي بفهمه واشي ما بفهمه .... بس رجاء بسيط لهدا الانونوميس انه انت اللي بدات بقلة الادب .... بدك تستمر بقلة ادبك خد راحتك بس  كلنا النا امهات سب علي متل ما بدك بس اترك امي لوحدها 

ورقة فاين

كانت عندي عادة ايام الجامعة كنت احب اكتب على ورق الفاين باي مكان كنا نروح عليه انا وصاحباتي .... انه هيك مين المجتمعين ووين ... وكل واحد بكتب التعليق اللي بده اياه ولسة محتفظة فيهم (بحب الدراما هههههه) اليوم تذكرت مرة كتبنا انا واعز صاحبتين الي يارا وراوية انه وين رح نكون بعد 10 سنين ! وتقريبا مر عليها 8 سنين .... الفاينة مش معي لاني تركت كل اشيائي الشخصية في بيت اهلي .... شو بدي احمل لاحمل معي !??! المهم انا كتبت اني بتمنى اكون بشتغل وساكنة في دبي ... صاحبتي يارا بتتمنى تكون في لندن وراوية في كندا ... حاليا انا في امريكا ويارا في استراليا وراوية في السعودية ! 

عن جد اجمل ايام حياتي كانت ايام الجامعة ... ما في مسؤوليات وكل اللي عنا احلام بنتمنى نحققها بيوم من الايام 

مواقف 6

مع انه اسمي المفروض سهل (اسمى) بس هون ما بنادوني الا اااازززما هههههه ولكم اسمى الله يقطع شركم

مبارح اكلت فلافل شغل بيتي بس زي طعم اللي في محلات عمان! يعني مغشوش شوي ! ههههه لانه ابوي بعمللنا الخلطة بالبيت زاكية بس بيور مش زي الشغل التجاري ! المهم كانت زاكية بس ناقصها حمص او شوية طحينية  وليمون بس بما اني انعزمت عليهم اكلت وما حكيت اشي 

زوجي نقل على شغل جديد ولكن فترة تجريبية يعني ما بدنا ننقل على الولاية التانية الا لما يتاكد من الشغل! الوقت غير مناسب ابدا لاني بدي اسافر كمان شهر على عمان بعرف ما لحقت لسه بس عرس اخوي عالصيف وكمان خبرت شغلي اني بدي اضل معكم بس لاخر الشهر وبدنا وقت نضبضب البيت واغراضنا!!وشغله طلبوه بشكل مستعجل يسافر وانا ما جهزت حالي للسفر كمان .... ما صرلي الا سبع اشهر بالبلد ولكن ومع ذلك تم الاتفاق انه يسافر وانا اضلني بالبيت ازبط اموري بما اني اخت رجال وهدا افضل الحلول !!!معي السيارة وبعرف وين اروح واجي! بتعرفو اليوم بصيرله اسبوع زوجي مسافر ولوحدي بالبيت!!! ولسه ضايل ٣ اسابيع وشوي! المنطقة الحمد لله امان والامان بوجه الله وقريبته ساكنة كتير قريب منا بس عمري في حياتي ما حسيت بالوحدة والغربة متل هالايام! نفسي احكيله ما بدي اتحمل هالمسؤولية!! وخايفة اكون لوحدي لكن كالعادة بضغط على نفسي لحتى ابين قوية وما في اشي بخوفني!! الله يمضي هالايام على خير 

صرت كمان اسمع مزاج اف ام هاليومين عالنت وكل ما تيجي اغنية تذكرني باهلي او الها ذكرى معينة اصير اعيط ! بكتب هالبوست وانا بسمع عبد الحليم حافظ الرفاق يتساءلون

حرام احنا مش هيك

اكتر شيء بزعلني بشوفه هون بالغرب ومش موجود عنا هو القراءة! الناس دائما معهم كتب سواء في مكان حكومي او في المطارات او المواصلات ..... وين مكان في انتظار لازم يكون مرتبط بكتاب وكمان بعودوا اطفالهم من الصغر على حب القراءة !

 نحن احق باول كلمة نزلت في القران الكريم ...... اقرا

للرجال فقط

مع انه لم يمضي على زواجي فترة طويلة ولكن صدقا هذه النصيحة يجب ان ياخذ بها كل الازواج .... نصيحة رائعة ومضحكة ههههههه

مقارنات

هذه النظريات هي محض تجارب شخصية وهي اراء وليست قواعد يتم تعميمها وقد لا تنطبق على الجميع لانه موضوع الشباب العرب في امريكاالكل فكرني بطلق حكم عام واني بظلم الاغلبية

اول مقارنة عن البنات في العلم العربي والبنات في الغرب .... اللي شفته وحسب تجربتي الشخصية ومن حولي واللي لاحظته من البنات في الغرب انه العربية مكرمةاكثر!كيف ? البنت العربية عموما تبقى في بيت اهلها حتى تتزوج وكل مصاريف تعليمها وما تحتاجه متوفر عادة من الاب او الاخ وحتى عندما تعمل يكون المردود لها الا اذا كان عندها مسؤولية اما الفتاة في الغرب يجب ان تتحمل مسؤولية نفسها من عمر 18 ومصاريف التعليم والسيارة والتامين الصحي منها الا اذا حبت تضل عند اهلها اللي نفسهم بشعروا بالتثاقل من اولادهم بعد سن معين وبقاؤها بالبيت لا يعني ان لا تتكفل بكامل مصاريفها

من عينة الاطفال اللي شفتهم وكمان مرة انا ما بطلق احكام لكن معظمهم ما عندهم تقدير لما يفعله الام والاب بمعنى ان الوالدين دائما مدينين للاولاد ولا شئ كاف بعكس ما تربيت عليه! ان الاولاد دائمي التقدير للوالدين ومستعدون للقيام باي شيء لارضاء اهلهم عكس ما رايته هنا

الناس هون دايما بضحكو بوجوه بعض ههههههه كنت استغرب هالشغلة اولها ههههه ياريت بالاردن نصير نضحك شوي بوجوه بعض

فلتبقي كبيرة يا مصر

بعد ان فقدنا الامل بانفسنا انت يا مصر من اعدت لنا الحياة والامل ... مع اروع ثورة بكل ما فيها من امثلة تبين كرم الاخلاق والاصرار لا تجعلي الايادي العابثة تشوه حقيقتك الجميلة وكبر موقعك .... لا تدعي الايادي الملوثة ان توقذ الطائفية .... انت  كبيرة يا مصر وستبقين كبيرة

الشباب العرب في امريكا

انا ما بحكي عن كل الشباب العرب في امريكا لكن للاسف من اللي شفته خلال هالفترة البسيطة هم الاكثرية ..... انه معظمهم ما بشتغل بشهادته وانما بكتفي باشغال بسيطة مثل بائع في كازية او شفير تاكسي او حتى بواب مع انه مواطن امريكي ومعه شهادة !! طيب اول ما وصلت امريكا كنت محتاج واضطريت تشتغل هيك شغل مش مشكلة بس مش تضل ١٠ و ١٥سنة في نفس الشغلة ?? ولو ما معك شهادة الكليات بتقبل اي شخص وبعد فترة سنة بنفس الولاية ممكن تدرس بسعر معقول ....لكن كانه بستسهلو هيك نوع من الشغل وبعضهم بصير يقدم على مساعدات من الحكومة وعلى هالاساس مستورة والحمد لله !! لكن وين المستقبل بالموضوع ?! واللي بشوفه انه هون الجميع اله نفس الفرص بالحصول على وظيفة يعني مش انه عربي ما بتوظف ! ما بعرف كيف بفكروا جد