Monday, September 05, 2011

مواقف 8

المفروض بكرة اغادر عمان لاميركا لكن الوالدة تعرضت لحادث بسيط أواخر أكمن يوم في رمضان .... الحمد لله رضوض بسيطة لكنها محتاجة راحة وامي من النوع اللي دايما تتحرك وتشتغل بالبيت ! مع انها مش صغيرة بالعمر وحتى لو حد بساعدها بتطلّع شغل من أي مكان ..... المهم بما انه ما في عند أهلي شغالة هالفترة وحسيت جد نفسيتها تعبانة انها ما بتتحرك كتير وما بتعمل اشي لذلك قررت اني أمد اجازتي كمان شهر ! يعني شهر بس رح أكون امسح وأجلي وأشطف ههههههه مع انه الشهرين اللي مضوا لم يخلوا الأمر من هالقصص هههه .. بصراحة اشتقت لبيتي ولمملكتي الخاصة وزوجي وهالشهر رح يكون شوي ملل لانه الكل تقريبا سافروا وبرجع روتين حياة الشغل  للجميع .... بس المهم بالموضوع امي تقوم بالسلامة و الله يحميها ويعطيها طولت العمر 

من زمان ما عملنا كعك العيد ! السنة اقترحت على اخواتي اللي كمان متغربات وكل وحدة الها بيت انه نلتم عند أهلي ونعمل كعك مع بعض وبنوزعهم علينا! وبالفعل عملنا تقريبا عشرة كيلو هههههه واشتغلنا فيهم من الساعة وحدة بالليل للساعة سبعةالصبح ! بس جد طلعو بشهّو!!!! ما صمدوا لثالث يوم العيد ! حتى حصتي اللي شالولي اياها آخدها معي اتاكلت ههههه الفكرة والله كانت باللمة ! بس طلعت لمة بتجنن 
وكعك بجنن كمان

مرة كان عندي موعد عند دكتور الأسنان وكنت مستعجلة ! مرّيت على كازية أعبي بنزين ووقفت سيارة كمان وكان فيها شاب ! المهم انا خلصت ومشيت بالسيارة ! شوي ولا حد بزمرلي انه وقفي !! انا طبعا نشف دمي! فكرت في اشي بالسيارة !!! المهم زي الهبلة صفيت على جنب وكان الشباك اللي بجانبي نصه مفتوح! اجا الشاب وبكل برود أعصاب بحكيلي متأسف بس شبهت عليكي وحدة درست معي في الجامعة الأردنية !! ههههه حكيت في بالي أهللللللا!! رديت لأ يا أخي غلطان أنا أصلا ما درست بالأردنية كلها !! طبعا هو مدخل نص راسه من الشباك وماسك فيه كمان ! حكيتله ممكن لو سمحت !! بحكيلي طيب وين درستي ؟ وافتحي الشباك شوي خلينا نتفاهم !!!! شو نتفاهم ؟؟؟ انا جد خفت !!! يعني عمري 31 سنة وعمري ما تعرضت لهيك موقف !!! ومش اني ملكة جمال !! يعني بنت عادية متلي متل كل البنات !! والأدهى بالموضوع انه الدنيا رمضان !! حكيتله شيل ايدك عن الشباك لو سمحت ومشيت !! صار يحكيلي طيب بليز بليز رقم تلفونك !! انا ضليتني ماشية بالسيارة وحكيت الله لا يرده اجره تحت العجل ولا راسه معلق بالسيارة المهم ضليت ماشية وجد خايفة ! لوهلة حكيت معقول بده يسرق شنتتي لانها كانت على الكرسي اللي بجانبي !! مشيت شوي بالسيارة ولا هو بلحق وراي لسة !!!!! والحلو بالموضوع انه ماسك ورقة صغيرة شكله كانت عليها رقم موبايله انه بده يرميلي اياها ههههههههههههههههههههههه آخ !!!! الدنيا أزمة وصايمين العالم طيب شو أعمل ؟!!! ضليت أأسرع وأحاول أضيعه ووقف مرة تانية عالاشارة ! تطلعت عليه بأشرلي بالورقة !!! وأنا بحكي لا حول ولا قوة الا بالله وبحرك براسي ! مش عارفة شكله استوعب انه استحي على دمك وبعدها ما شفته وراي ! بحكي لأخوي هيك صار معي بحكيلي لونك أعطيتيه رقمي بس ههههههههه صح والله كان لازم هيك عملت

مرة انعزمنا عند دار خالي وكان في صبايا صغار ! طبعا بالنسبة الي هسه صبايا صغار يعني أقل من العشرين ومنهم بنات اخواتي ! كانوا حابين يطلعوا ياكلوا آيس كريم بعد الافطار! ومتى تذكروا ! الساعة 11 بالليل وطبعا بما انه الأمور عنا مش سايبة وين يختي انت وياها ؟؟!! بس يقنعوا فيهم وما بنتأخر وما بعرف شو ! ومنهم وحدة جايبة سيارة جديد وحابة تطلع فيها بس امها مش مأمنة عليها ! .... بعد نقاش ولأ وآ ليش يا اسمى ما تروحي معهم ! بما اني كبيرة وبأمنوا عليهم معي ! انا حكيت أوكي بيبي سيتر مش مشكلة المهم آكل ايس كريم كمان ههههه ومع ذلك طلعوا معنا شباب وبصراحة أحسن ! المهم رحنا أكلنا وانبسطنا ! مع انهم كلهم صغار لكن حلوين ! لما روحنا طلعت مع الصبية اللي جايبة السيارة جديد وبتدرب عليها وكانو معي بنات اخواتي  .... حطوا على أغنية كنت كتير أسمعها بأمريكا بس ما أعرف المغني ولا متذكرة اسم الأغنية بس بحكولي هاي الأغنية اهداء منا الك يا خالتو وصارو يغنولي اياها بالسيارة ! اسمها جست ذي واي يو أر كانت لحظة رح أتذكرها طول عمري وجد كنت رح أبكي !! جد مأزكاهم !!!! يعني ديرة بالي عليهم وانه كنت دايما بيبي سيتر الهم ما راحت عالفاضي هههه ومن يومها صارت من أغانيه المفضلة

6 comments:

Qwaider قويدر said...

بصراحة ... زيي زييك ... الإشي اللي لا يمكن تعويضه ابدا و متوفر كثير عند الأهل هو الحياة الإجتماعية ... جد لا يمكن تلاقيها في اي مكان في العالم

سلامة الوالدة، و الله انا امّي صار معها نفس الشي، الله يكون بعونهم لأهالينا ... ربونا تعبو فينا و بالآخر كل واحد فينا في بلد! الله بيعين

امّا عن الجيل الجديد ... فحدّث و لا حرج... يعني عن جد بيحلّو اي مكان بيكونو فيه ... السنة كلهم كبرانيين و جد خلّو الدنيا طعمها غير في الإجازة. على الرغم من الشوارع و السواقة في عمّان لا تطاق... بس الناس بتحلّيها

Haitham هيثم Al-Sheeshany الشيشاني said...

الأهم فالمهم

1 كيلو إلي :كعك:

و إذا ما في مجال المهم إم عمر ما تحصّل شي

هذا أهم شي عندي
خخخخخخخخ
---

سلامتها الوالدة و ما شاء الله عليك إنك قررت تضلي و يعين زوجك

حيردها إلك يوما ما و يقلك لو حماتك "أمه" صار معها شي مشابه "أو مو مشابه حتى" كان ما عملت هيك - و بتشوفي

لوول

"محاولة فتنة"
---
الروتين قاتل، بأي شكل كان

-----
أحلى إهداءاااااااااااات

لوول

الشباب بس بدهم الواحد يعبرهم عفكرة! بس!
لو إحنا نستثمر طاقاتهم و نسمعلهم شوي بنحصل "مثلجات" كثييييييييرة + أشياء أخرى :)

-----

معاكسات في رمضان!
هممممممممممم

عجبني الشب
(6)

SimSim said...

Qwaider: والله أهلا وسهلا !! الله يسلمك ! احنا بنفكر انه بنخفف حمل بس نتركهم ونسافر بس بالعكس ! الله يسعدهم ويريح بالهم

الجيل الجديد
ههههه مش ملحقة والله على نهفاتهم وقصصهم !! وكلهم نفس الجيل ! الله يحميهم لأهاليهم

بالرغم من كل الاشياء السيئة في عمان بس جد الواحد ما بستغنا عنها وعن زيارتها ! وكل عام وانت بألف خير

SimSim said...

Haitham: أولا الكعك ان شاء الله بحسب حسابك بالنقلة الجاي لانه اللي عملناهم سلامه تسلمك هههه انمسحوا

الله يسلمك ! وهو رح ينتقم مني انه ممكن ما يخليني أنزل الصيف الجاي بس حرام قلبه كبير ! يمكن !!!!! ما يحقد علي !! يمكن !! ههههه

وانا والله بعبرهم وبسمعلهم يعني ما بطنشهم عادة ! وجد الله يحميهم ويطعموني آيس كريم ههههه

عجبك ؟؟!! انا كنت رح أعجب عليه والله ... تنذكر وما تنعاد !

كل عام وانت بخير

yosef said...

الحمد لله على سلامة الوالدة
ولو انا افتقدناكِ وانتِ في عمان لكن طالما انك مبسوطة وسعيدة مع الاهل
كل عام وانتِ بالف خير

SimSim said...

Yosef: والله نوّر البلوج !! كيفك ؟ وانا اشتقتلكم والله ! بس جد ما بحس بالوقت كيف بطير مع انه في كتير اشياء بدي أحكيها ... لكن راجعيتلكم قريبا

:D

الله يسلمك وكل عام وانت بألف خير