ليلة الحـــنـــّــة

بمناسبة الاعراس (ملاحظين انه اعراس السنة ما شاء الله اكتر من اي سنة ؟) المهم حابة احكيلكم عن ليلة الحنة

اللي بعرفه انه حفلة ليلة الحنة هو تقليد فلاحي يعني اهل المدن ما كانت دارجة عندهم هاي العادة (وانا بما اني من قضاء القدس اي القرى المحيطة بالقدس) ليلة الحنة شيء اساسي عنا....

من زمان كانت ليلة الحنة تقام قبل العرس بيوم وفيها بيجي العريس واهله على بيت العروس ومعهم سدر حنة او اكتر وعليه شمع وبرقصوا مع ترديد الاغاني التراثية للمناسبة ومرات كان ييجي العريس يلبس العروس الذهب (التلبيسة) وكمان كانوا يحـنـّـوا العروس مع اغاني شعبية خاصة للحنة ..... وبعدها بروّحوا اهل العريس حتى تبدأ عندهم ما يسمى سهرة الشباب .... والي فيها بعزم العريس كل اصحابه واقاربه وليمضّوا الليل كله دبكة واغاني شعبية ......

البنات عادة اذا كانوا من اهل العروس بيعطوا مجال لاهل العريس لحتى يغنوا اثناء وجودهم وبعد ما يروّحوا اهل العروس بتبلش حفلتهم عالمزبوط ...... اما اذا كانوا من اهل العريس ...بكونوا بمكان منفصل عن الشباب وكمان بحتفلوا بس احنا كنا كل مرة نصير نتفرح على الشباب (من وراء ستار طبعا ههههه) وهمه يدبكوا ويحنوا العريس اغانيهم جد حلوة

ايامنا هاي البنات صاروا اوعى ودلوعات اكتر ... يعني ليلة الحنة صارت اقل اشي قبل العرس بيومين وممكن اكتر يعني لحتى العروس يكون معها مجال ترتاح قبل العرس ..... والعريس ما بيجي على بيت العروس لانه التلبيسة صارت بالفندق او الصالة ..... اهل العريس بيجيبوا الحنة بس معظم بنات هالايام ما بحبوا يتحنوا ...... الا اذا وحدة متخصصة برسم الحنة

والضيافة زمان كانت ملبس او كنافة او ممكن جاتو بس ايامنا صار فيها بوفيه يعني عشاء كامل او سناك .....

بالنسبة للعروس وشو تلبس طبعا صار موديل انه العروس تبدل اكتر من فستان مع انها كانت عادة بس مقتصرة على اهل الخليل ..... بس نحن عنا بالعيلة كمان العروس صارت تفصّل توب فلاحي وتلبسه خلال الحفلة

يمكن انا كتير متحمسة لانه ليلة الحنة لبنت عمتي يوم الجمعة مستنيين على نار .... بنحب ليلة الحنة اكتر من العرس لانه بنكون على راحتنا اكتر باللبس والرقص

الله يتمم للكل على خير وعقبال العزابية