Wednesday, March 21, 2012

الله يحبّب فيكي كل أمة محمد

من اسبوع تقريبا كنت معزومة على عيد ميلاد ناس بعرفوهم دار حماي .....كانت جمعتهم حلوة وولاد صغار وعجقة ! تذكرت جمعاتنا وكيف لما اخواني يتجمعوا عند امي وأبوي ! ما علينا .... قاعدين ومعمرين الأرجيلة ولا أهلي بتصلوا فيه ! عادي الله يسعدهم دايما بتصلوا ...انا سحبت حالي وطلعت أحكي معهم ! الحمد لله كويسين ! وصيتهم يبعتولي لبن جميد ومعسل وقهوة مع ناس جايين من عمان ! يعني كالعادة ما بنتغير ! اجا الدور أحكي مع امي ! دايما بحكي معها يعني ما في مشكلة بس ما بعرف ليش بس حكتلي الله يحبب فيكي كل أمة محمد - دايما بتحكيلنا اياها كلنا- هيك خنّقت وكان نفسي أبكي !!بحكيلها يما هسه ادعي كل الناس يحبوني انا مش عند أمة محمد بس هههههه وبحكي وانا ماسكة حالي جد مش عارفة ليش !! كله من مزاج اف ام ! طول الليل و النهار حاطين أغاني للأم !! ضلّت تدعيلي زي دايما وانا بس بدي أنهي المكالمة عشان ما أفقد أعصابي وانا بحكي معها ! لانه والله ما اشي بقنعها انه ما في اشي واني بس نفسي احط راسي على ركبتها !! ودعتها ودمعت شوي بس الناس والعيلة كلها موجودة ! ضليت أكابر على حالي لحتى طلعت بالسيارة مع بنت حماي وبعدها انفجرت بكى ! الله يسعدك يا امي وأشوفك على خير قريبا 

4 comments:

Um Ommar said...

الله يكون بعونك بغربتك
ويخفف عنك
ويحفظلك الوالده الطيوبه ومايحرمها منك يارب

Lily said...

allah yjm3ko 3a 5er ya rabby dayman, w y5allelek eyaha

yosef said...

سمسم
مساء الخير

كل عام وامك وجميع الامهات بالف خير

وان شاء الله ربنا يجمعك فيهم عن قريب
دمتِ بخير

SimSim said...

يسعدكم كلكم وآمين !! الله يجمع الكل بالحبايب