Saturday, June 11, 2011

مواقف 6



مع انه اسمي المفروض سهل (اسمى) بس هون ما بنادوني الا اااازززما هههههه ولكم اسمى الله يقطع شركم

مبارح اكلت فلافل شغل بيتي بس زي طعم اللي في محلات عمان! يعني مغشوش شوي ! ههههه لانه ابوي بعمللنا الخلطة بالبيت زاكية بس بيور مش زي الشغل التجاري ! المهم كانت زاكية بس ناقصها حمص او شوية طحينية  وليمون بس بما اني انعزمت عليهم اكلت وما حكيت اشي 

زوجي نقل على شغل جديد ولكن فترة تجريبية يعني ما بدنا ننقل على الولاية التانية الا لما يتاكد من الشغل! الوقت غير مناسب ابدا لاني بدي اسافر كمان شهر على عمان بعرف ما لحقت لسه بس عرس اخوي عالصيف وكمان خبرت شغلي اني بدي اضل معكم بس لاخر الشهر وبدنا وقت نضبضب البيت واغراضنا!!وشغله طلبوه بشكل مستعجل يسافر وانا ما جهزت حالي للسفر كمان .... ما صرلي الا سبع اشهر بالبلد ولكن ومع ذلك تم الاتفاق انه يسافر وانا اضلني بالبيت ازبط اموري بما اني اخت رجال وهدا افضل الحلول !!!معي السيارة وبعرف وين اروح واجي! بتعرفو اليوم بصيرله اسبوع زوجي مسافر ولوحدي بالبيت!!! ولسه ضايل ٣ اسابيع وشوي! المنطقة الحمد لله امان والامان بوجه الله وقريبته ساكنة كتير قريب منا بس عمري في حياتي ما حسيت بالوحدة والغربة متل هالايام! نفسي احكيله ما بدي اتحمل هالمسؤولية!! وخايفة اكون لوحدي لكن كالعادة بضغط على نفسي لحتى ابين قوية وما في اشي بخوفني!! الله يمضي هالايام على خير 

صرت كمان اسمع مزاج اف ام هاليومين عالنت وكل ما تيجي اغنية تذكرني باهلي او الها ذكرى معينة اصير اعيط ! بكتب هالبوست وانا بسمع عبد الحليم حافظ الرفاق يتساءلون

3 comments:

Haitham هيثم Al-Sheeshany الشيشاني said...

صحتين على الفلافل :)

و إن شاء الله يكتب إلكم الخير بشغل زوجك الجديد

و بكفي نق!

خخخخخ

سلاااااااااااام
يا أزززززززمة

:)

---
إحنا كمان شهر مروحين كمان :)

و سننقض على الفلافل بكل تأكيييييييييييد

SimSim said...

Haitham: انا ما بنق يا شرير انت !! واا سانقض على الفلافل والكنافة كمان هههه

Whisper said...

حبيبتيييي...يا على قلبي ان شاء الله...لا تحملي هم و ان شاء الله هال 3 اسابيع بمشو بسرعه....و ضلك ركزي على نزلتك على عمان و تفائلي فيها و بالتحضير للعرس و العجئه :)

ربنا يجمعكم عن قريب كلكم بالسلامه يا رب