Wednesday, November 09, 2011

عيد من الآخر

صارلي تقريبا شهر واصلة من عمان ! ومن هناك عرفت انه ما رح نرجع على تكساس ! رح ننقل ولاية تانية حسب شغل زوجي ! لكن اللي ما كنت أعرفه وعرفته قبل ما آجي انه رح نعيش في فلوريدا قريب من بيت حماي ومعظم أهل زوجي ! يعني بصراحة انا فرحت وانغصيت بنفس الوقت ! انه لو سافر وراح واجا بكون في ناس حولي وصعب انه يتركني زي آخر مرة وكمان التنقل مش كتير حلو وانه في ونس حولي بس انا جد طبيعتي بحب اشتاق ههههه يعني ابعد تحلى وبصريح العبارة ما بحب الاحتكاك الكتير مع العالم مين ما كان يكون ! وما شاء الله كلهم قراب على بعض يعني تحس حالك في حارة من حواري عمان والحمد لله 

المهم انا نقلت على بيتي بس الأحد من الاسبوع الماضي وبين بلشة التنقيل والزيارات جد مش مجمعة بالمرة  ..... يوم الثلاثاء بالليل ما بعرف شو اجا على بالي اشوف الفيس بوك قبل ما أروح أنام ولا بنت أختي كاتبة انا لله وانا اليه راجعون ... طبعا انا شوية العقل اللي كانو عندي تبخروا ! رادة عليها صاحبة الها مين من غير شر؟؟بتحكيلها خالة ماما ! طبعا خالة مامتها يعني خالتي وانا هاتي يا عياط !! وأتصل على أختي على طول ! شو اللي صاير مالها خالتي ؟؟ بتحكيلي ما مالها اشي تعبانة شوي وامي عندها ! بحكيلها لأ ماتت !!! وأختي بتحكيلي لأ ما ماتت !!؟؟ بس هاي لانا بتحكي انها ميتة !! طلعت هي المسكينة لسة مش واصلها الخبر كانت الساعة 6 الصبح عندهم ! وليليتها ما سكتت عياط مع انه خالتي من أول ما وعيت على الدنيا وهي في السرير وآخر فترة تعبت بس خلص ما بهون على الانسان شو ما كان ! الله يرحمها ويدخلها فسيح جناته
خبر مثل هيك بنكتب على الفيسبوك ؟

 طبعا يوم الأربعاء اجو بنات حماي وحماتي يعزوني وحماي ما قدر ييجي لانه كان تعبان وانبسطت انهم اجو وحتى حماي حكى معي وعزاني واعتذر لانه ما اجى وانا نوعيتي ما بلوم أي انسان على أي شيء .... المهم تاني يوم واللي هو الخميس ... كل هدا الاسبوع الماضي ! آ يوم الخميس اجت عندي بنت حماي بدها تشرب فنجان قهوة الصبح وبتحكيلي اذا بتحبي تطلعي ! انا عندي كتير ترتيب وشغل بس الحمد لله اللي طلعت معها يومها ! لفلفنا شوي وجبت أكمن شغلة ناقصة ومرينا على الصيدلية ولا زوجي ومعه والده بالصدفة شفناهم هناك !سلمنا عليه وطلب مني أجيبله بزر عين شمس وعزاني كمان مرة بخالتي وكان ما شاء الله عليه بضحك ما ماله اشي !! شوي صغيرة بدها تروح تجيب أولادها من المدرسة اجانا تلفون انه حماي أغمي عليه وأخدوه على المستشفى ! ما خفنا كتير لانه اله فترة تعبان وكتير بغمى عليه وهوقلبه كتير ضعيف ! نسيت موضوع ولادها وضلينا رايحين على المستشفى وهي تعيط وانا أحاول أهدي فيها بس جد طلعت فاشلة في هيك مواقف 

جبنا حماتي وضلينا رايحين عالمستشفى وطلبنا نشوفه وبس وصلنا بنسأل الممرضة عنه سكتت وحكت لحظة بس ييجي الدكتور ! احنا حسينا في اشي غلط ! بعدها شفنا زوجي وحكالنا انه حماي توفى !بلّمت وبلشوا يعيطوا !بكيت الا لما شفته ! انه بس من ساعة شفته بحكي وبضحك وهلأ هيك جثة ما بتتحرك ! ما قدرت أقاوم ! لما صحوا على حالهم وصاروا يحكو بالدفن أكيداحنا مش بالأردن اليوم مات بكرة على صلاة الظهر يوم الجمعة الدفن لأ ! في مراسيم الدفن وأولويات وما بعرف شو !!! جد لحظتها دعيت أنه بس أموت أكون بالأردن أو بفلسطين أو أكيد السعودية!! يمكن كان التأخير لصالح بناته لانهم اجوا من ولايات تانية 

الدفن كان يوم السبت لكن كلهم كانوا موجودين يوم الجمعة ....اقترحت على سلفتي نعمل أكل للجميع في بيتي ... كان شكلنا بضحك واحنا معجوقين وبسرعة بدنا نخلص وما شاء الله على رأي جارنا أكل لجيش بس الحمد لله طلع زاكي 

يوم الدفن اللي هو كان وقفة عرفة وهدا شيء أول مرة بحياتي بعمله انه رحنا كلنا على المسجد نصلي صلاة الميت وأول مرة بحياتي بصليها وبعدين رحنا كمان على المقبرة وشفنا الدفن ! بالأردن من المستحيلات النساء يعملوا هيك وأنا بتمنى اني ما أعملها مرة تانية !! بيت العزا للرجال كان في بيتي وللنساء كان عند أخو زوجي ! أيام ما بتمنى تنعاد أبدا ! كل ما يهدوا شوي يرجعوا يتذكروا ويصيروا يعيطو !! الموت صعب عن جد !!! بس كل اللي كنت أدعيه وأتمناه انه الله يرحمه ويعطينا حسن الخاتمة 
 انا لله وانا اله راجعون

صدقا بس مبارح واليوم رقت في بيتي وهديت أعصابي 

وكل عام وأنتم خير

9 comments:

LioneSS said...

الله يرحم جميع اموات المسلمين و يدخلهم فسيح جناته

زكرتيني بسنه 2007 خلال 10 اشهر كان عنا 7 عزوات كلهم بعائلة امي، كانت جد سنه كبيسة على العايلة، بس الحمدلله الله بصبّر الناس لانه جد الموت صعب و صعب كتير و خصوصا موت الفجأة، انه هلأ كان بحكي معي و ما ماله شي و فجأه اختفى!!!

الله يصبركم و يصبر الجميع ...


وكل عام و انت بخير

نيسان said...

الله يرحم موتاكم ويغفر لهم ويتجاوز عنهم ويجعل مثواهم الجنه...
انا لله وانا اليه راجعون.

SimSim said...

LioneSS: الله يرحمهم جميعا ويرحمنا كمان

وانت بألف خير وبصحة وسلامة

نيسان: شكرا عزيزتي

ويجعل مثوانا احنا كمان الجنة

ياسمين said...

الله يرحمهم ويرحم جميع موتي المسلمين يارب..ويغفر لهم..

Whisper said...

عظم الله اجركم بخالتك و بوالد زوجك
الله يرحمهم و يتقبلهم يا رب

السنه 7 اشخاص توففو من عيلة بابا ومن عيلة ماما و بالعيد كان الوضع كتير صعب لانه اول عيد بعد وفاتهم

الله يرحمهم اجمعين و يصبركم يا رب

rare said...

3atham Allah ajrakom, w Alla ysaberkom... hy mne7 enkom n2lto jmb dar 7maky, 3shan tkono m3 7amatk b hal fatra ... Alla ykon m3kom

UmmOmar said...

لا حول ولا قوه إلا بالله العلي العظيم
الله يرحم كل امواتكم يارب ويعينكم ويصبركم على ما إبتلاكم


معلش,, الدنيا هيك,, يوم معك ويوم عليك

SimSim said...

ياسمين,Whisper,rare,UmmOmar: thank u sooo much w Shakara Allah Sa3yakom ! maa tshofoo shaar fee 3azeez !!

Rana Al Sha'bani said...

الله يرحمهم وعظم الله أجركم !