مواقف 9

السنة أول مرة بجرب أعمل الديك الرومي في Thanksgiving مش من مبدأالاحتفال بس وين ما بتروح بتشوفه محمر وشكله بشهي فقررت أعمله وما أخبر حد لانه ما كانت العيلة مقررة تعمل اشي ! وهيك اذا ما كان مستوي أو طعمه عجبة الله بستر على الجميع ههههه فجأة اجا زوجي بحكيلي هاي فلانه عاملة كذا وهديك عاملة هيك فقررنا انه نتجمع كلنا ونتشارك بالأكل !! يا حبيبي واذا طلع مش زاكي  !!؟  لكن الحمد لله ... كان بشهي بس بده وقت أقل بالفرن ....الكل شهدلي انه أزكى من اللي بعملوا الأمريكان لانه بكون في شويه زنخة وما  بضيفوا عليه لا بهارات ولا اشي ! وانا جربته ! عن جد بقلب المعدة 

طول عمري بحب الأرجيلة بس لاني بعرف مضارها ما بأرجل كل يوم ولا كل أسبوع ومرات كل أكمن شهر !!!! لكن هون مع أهل زوجي !!! كل عيلة عندها أرجيلة وبس تزورهم لازم يشغلوها وخاصة حماتي !!! يا عمتي والله ما بدي اليوم !!! بس شوي ! بدك تخليني أأرجل لحالي !!! وبس أضل بالبيت بيجي زوجي بطلب أعمرله اياها !!!! لا كسبنا صحة

مرة واحد أمريكي بسألني انت من وين بحكيله انا من الأردن .... سكت .... بحكيله بتعرف وين الأردن ؟ بحكيلي آ في شرق أوروبا !!! ههههه بحكيله انتو الأمريكان بتعرفوش خارج نطاق الولايات عندكم ومنيح اذا بتعرفوهم !! طبعا حكيتله وين الأردن وعلمته يحكي أهلا وشكرا ههههه ما عرف يحكي مرحبا

تقريبا من شهرين رحت أول رحلة صيد سمك في حياتي .... وجد كنت مش متشجعة أروح لانه بعرف الصيد ممل وممكن ما تصيد ولا اشي بس جد كانت رحلة روعة وصيدت 9 سمكات 4 كبار و 5 صغار ... بتحس بالفرحة لمن تصيد ما بعرف ليش

هاي اول سمكة بصيدها

زوجي صاد سمكة قرش صغيرة بس لانه ما بناكلها أعطيناها لصينيين كأنه أعطيتهم 100 ليرة وبتصوروا معها وأحلى اشي صاروا يحكوا للناس انه همه اللي صادوها ههههه انا حملتها وتصورت معها بس كنت نشفانة خوف 

مواقف 8

المفروض بكرة اغادر عمان لاميركا لكن الوالدة تعرضت لحادث بسيط أواخر أكمن يوم في رمضان .... الحمد لله رضوض بسيطة لكنها محتاجة راحة وامي من النوع اللي دايما تتحرك وتشتغل بالبيت ! مع انها مش صغيرة بالعمر وحتى لو حد بساعدها بتطلّع شغل من أي مكان ..... المهم بما انه ما في عند أهلي شغالة هالفترة وحسيت جد نفسيتها تعبانة انها ما بتتحرك كتير وما بتعمل اشي لذلك قررت اني أمد اجازتي كمان شهر ! يعني شهر بس رح أكون امسح وأجلي وأشطف ههههههه مع انه الشهرين اللي مضوا لم يخلوا الأمر من هالقصص هههه .. بصراحة اشتقت لبيتي ولمملكتي الخاصة وزوجي وهالشهر رح يكون شوي ملل لانه الكل تقريبا سافروا وبرجع روتين حياة الشغل  للجميع .... بس المهم بالموضوع امي تقوم بالسلامة و الله يحميها ويعطيها طولت العمر 

من زمان ما عملنا كعك العيد ! السنة اقترحت على اخواتي اللي كمان متغربات وكل وحدة الها بيت انه نلتم عند أهلي ونعمل كعك مع بعض وبنوزعهم علينا! وبالفعل عملنا تقريبا عشرة كيلو هههههه واشتغلنا فيهم من الساعة وحدة بالليل للساعة سبعةالصبح ! بس جد طلعو بشهّو!!!! ما صمدوا لثالث يوم العيد ! حتى حصتي اللي شالولي اياها آخدها معي اتاكلت ههههه الفكرة والله كانت باللمة ! بس طلعت لمة بتجنن 

وكعك بجنن كمان

مرة كان عندي موعد عند دكتور الأسنان وكنت مستعجلة ! مرّيت على كازية أعبي بنزين ووقفت سيارة كمان وكان فيها شاب ! المهم انا خلصت ومشيت بالسيارة ! شوي ولا حد بزمرلي انه وقفي !! انا طبعا نشف دمي! فكرت في اشي بالسيارة !!! المهم زي الهبلة صفيت على جنب وكان الشباك اللي بجانبي نصه مفتوح! اجا الشاب وبكل برود أعصاب بحكيلي متأسف بس شبهت عليكي وحدة درست معي في الجامعة الأردنية !! ههههه حكيت في بالي أهللللللا!! رديت لأ يا أخي غلطان أنا أصلا ما درست بالأردنية كلها !! طبعا هو مدخل نص راسه من الشباك وماسك فيه كمان ! حكيتله ممكن لو سمحت !! بحكيلي طيب وين درستي ؟ وافتحي الشباك شوي خلينا نتفاهم !!!! شو نتفاهم ؟؟؟ انا جد خفت !!! يعني عمري 31 سنة وعمري ما تعرضت لهيك موقف !!! ومش اني ملكة جمال !! يعني بنت عادية متلي متل كل البنات !! والأدهى بالموضوع انه الدنيا رمضان !! حكيتله شيل ايدك عن الشباك لو سمحت ومشيت !! صار يحكيلي طيب بليز بليز رقم تلفونك !! انا ضليتني ماشية بالسيارة وحكيت الله لا يرده اجره تحت العجل ولا راسه معلق بالسيارة المهم ضليت ماشية وجد خايفة ! لوهلة حكيت معقول بده يسرق شنتتي لانها كانت على الكرسي اللي بجانبي !! مشيت شوي بالسيارة ولا هو بلحق وراي لسة !!!!! والحلو بالموضوع انه ماسك ورقة صغيرة شكله كانت عليها رقم موبايله انه بده يرميلي اياها ههههههههههههههههههههههه آخ !!!! الدنيا أزمة وصايمين العالم طيب شو أعمل ؟!!! ضليت أأسرع وأحاول أضيعه ووقف مرة تانية عالاشارة ! تطلعت عليه بأشرلي بالورقة !!! وأنا بحكي لا حول ولا قوة الا بالله وبحرك براسي ! مش عارفة شكله استوعب انه استحي على دمك وبعدها ما شفته وراي ! بحكي لأخوي هيك صار معي بحكيلي لونك أعطيتيه رقمي بس ههههههههه صح والله كان لازم هيك عملت

مرة انعزمنا عند دار خالي وكان في صبايا صغار ! طبعا بالنسبة الي هسه صبايا صغار يعني أقل من العشرين ومنهم بنات اخواتي ! كانوا حابين يطلعوا ياكلوا آيس كريم بعد الافطار! ومتى تذكروا ! الساعة 11 بالليل وطبعا بما انه الأمور عنا مش سايبة وين يختي انت وياها ؟؟!! بس يقنعوا فيهم وما بنتأخر وما بعرف شو ! ومنهم وحدة جايبة سيارة جديد وحابة تطلع فيها بس امها مش مأمنة عليها ! .... بعد نقاش ولأ وآ ليش يا اسمى ما تروحي معهم ! بما اني كبيرة وبأمنوا عليهم معي ! انا حكيت أوكي بيبي سيتر مش مشكلة المهم آكل ايس كريم كمان ههههه ومع ذلك طلعوا معنا شباب وبصراحة أحسن ! المهم رحنا أكلنا وانبسطنا ! مع انهم كلهم صغار لكن حلوين ! لما روحنا طلعت مع الصبية اللي جايبة السيارة جديد وبتدرب عليها وكانو معي بنات اخواتي  .... حطوا على أغنية كنت كتير أسمعها بأمريكا بس ما أعرف المغني ولا متذكرة اسم الأغنية بس بحكولي هاي الأغنية اهداء منا الك يا خالتو وصارو يغنولي اياها بالسيارة ! اسمها جست ذي واي يو أر كانت لحظة رح أتذكرها طول عمري وجد كنت رح أبكي !! جد مأزكاهم !!!! يعني ديرة بالي عليهم وانه كنت دايما بيبي سيتر الهم ما راحت عالفاضي هههه ومن يومها صارت من أغانيه المفضلة

7 مواقف

  اولا رمضان كريم على الجميع مع انها متأخرة شوي الله يتقبل منا أجمعين بس الاشي الوحيد اللي ناقص في رمضان السنة هي سيري ! مين سيري ؟ هي مدبرة المنزل اللي كانت عنا الله يسهل عليها ! عن جد رمضان كان أحلى بوجودها ههههه الآن ربع الوقت في رمضان بس بالمطبخ !!!!! جلي وشطف وتضييف !!! وهسة صايرين أغلى من الذهب يعني بس يفكروا أهلي يجيبوا وحدة تانية بدهم يكتوا 4 آلاف دينار !!!!!؟ لانه الأردن على القائمة السوداء بالنسبة للشغالات هههه

طبعا بما انه كلنا مغتربين وما في شغلة ولا عملة ! دائما بنتسحر وبنصلي الصبح وبنام ! بس أبوي الله يطول عمره ما بتروح عليه صلاة الفجر أبدا رمضان ولا مش رمضان ! ولازم يصلي بالمسجد ! المهم من يومين كنا صاحيين وساعته ما رنت وأذن الفجر ! تطلعت عليه وهو نايم ومستغرق في النوم !! بس ما بعرف ما حبيت أصحيه !حسيته جد تعبان وما صدق ينام من صوتنا ! مش حجة بس خلص خليته نايم ! تاني يوم راجعني بحكيلي يابا مش انتو بتضلوا صاحيين ؟ ليش ما صحتيني على الصلاة وطبعا ما كذبت عليه وحكيتله الحقيقة ! كان جد زعلان بس وعدته انه ما اعيدها مرة تانية لاني حسيته فقد اشي في هداك اليوم !! وانا راحت عليه دعاء من أدعيته في المسجد !! الله يعطيه الصحة والعافية ويطول بعمره

كالعادة ما بتابع اشي برمضان غير انه كل البرامج والمسلسلات مكررة وأسخف من بعضها جد مين عنده وقت يتابع اشي ؟؟!!! بس الشيء الوحيد اللي كان نفسي أحضره هو مسلسل الحسن والحسين ! ما بعرف شو المأخذ على المسلسل بس عندي فضول أحضره ! طبعا ما بعرف وين بيجي وأي ساعة وكمان لو بعرف ما عندي وقت !! بتمنى الاقيه على سي دي آخده معي بس أسافر اتابع بعدين على رواق

لمن بدي اطلع مشوار بده ربع ساعة لازم أحسب حساب بدي تقريبا ساعتين أو ممكن أكتر غير انه بيتنا بعيد .... الأزمة الخانقة في عمان !! من يومين كنت مروحة من طبربور لليادودة وجد بالطريق طلعت روحي !! وكنت بستغفر وأختي بتسمع اذاعة مزاج ! وفي مسابقة على الاذاعة وما بعرف شو اجا على بالي اتصل واشارك معهم ههههه واتصلت وشاركت معهم وكان حوار لطيف .... اول مرة بحياتي بحكي مع اذاعة او تلفزيون بس عشان تشوفوا الأزمة في عمان شو بتعمل ههههه

من الآن بلشت أحسب كم كيلو قهوة وكم كيلو بقلاوة بدي آخد معي لأهل زوجي وما بدهم الا من انواع معينة !!! الله يستر من  الوزن

بدون فزلكة وكأنه الي زمان برة بس جد صرت أخاف أسوق في عمان ! ما لحقت أنسى كيف الناس بتكون تطاوش مطاوشة في السواقة بس هسة اذا في حد ممكن يوصلني ما بقول لأ أبدا

طول عمري نفسي يكون عندي بسة مرتبة ! مرة ربيت بسة شوارع هههه سميتها فرهود ههههه لكن بسة مرتبة كان نفسي أجيبها وأربيها وأدير بالي عليها وحكيت بأمريكا الناس بربوا حيوانات بالبيت وأكيد رح تكون الفكرة متقبلة أكتر ... خاصة كمان انه امي بتكره البسبب وطول عمرها تحكيلي في بيتك ان شاء الله بتربي قرود ما الي دخل وحكيت يلا بجيب عندي قطقوطة صغيرة بس للأسف زوجي بكره الحيوانات بالبيت  !!! ومستحيل يرضى أجيب بسة .... قبل ما اوصل عمان حكالي أخوي بده يجيب بسة صغيرة ! حكيتله مستحيل امي ترضى بس شكله للأسف حطها أمام الأمر الواقع وجابها !! طبعا هي بتجنن ومسلية بس ما بتعرف عليها الا بالليل ! كيفك يا حبيبتي يا كرموشتي يا بوشكا ؟!! وبس !! مين بطعميها وبحممها وبنظف وراها ؟؟! محسوبتكم !! وامي طول نهارها تشكي منها !! يعني بعد هالتجربة ومع انها كتير أمورة بس مسسسسسسسستتتتحيل أفكر أجيب عندي بسة عالبيت

كل ما بحكي معي زوجي بحكيلي ما زهقتي ؟ ما بدك ترجعي ؟ هو حكالي انه بس توصلي بتصيري بدك ترجعي بعد اسبوع ! مش شغلة زهق ومبسوطة مع أهلي ومع الجميع واللمات والكنافة ههههه لكن اشتقت لبيتي وروتين حياتي وزوجي

مواقف 6

مع انه اسمي المفروض سهل (اسمى) بس هون ما بنادوني الا اااازززما هههههه ولكم اسمى الله يقطع شركم

مبارح اكلت فلافل شغل بيتي بس زي طعم اللي في محلات عمان! يعني مغشوش شوي ! ههههه لانه ابوي بعمللنا الخلطة بالبيت زاكية بس بيور مش زي الشغل التجاري ! المهم كانت زاكية بس ناقصها حمص او شوية طحينية  وليمون بس بما اني انعزمت عليهم اكلت وما حكيت اشي 

زوجي نقل على شغل جديد ولكن فترة تجريبية يعني ما بدنا ننقل على الولاية التانية الا لما يتاكد من الشغل! الوقت غير مناسب ابدا لاني بدي اسافر كمان شهر على عمان بعرف ما لحقت لسه بس عرس اخوي عالصيف وكمان خبرت شغلي اني بدي اضل معكم بس لاخر الشهر وبدنا وقت نضبضب البيت واغراضنا!!وشغله طلبوه بشكل مستعجل يسافر وانا ما جهزت حالي للسفر كمان .... ما صرلي الا سبع اشهر بالبلد ولكن ومع ذلك تم الاتفاق انه يسافر وانا اضلني بالبيت ازبط اموري بما اني اخت رجال وهدا افضل الحلول !!!معي السيارة وبعرف وين اروح واجي! بتعرفو اليوم بصيرله اسبوع زوجي مسافر ولوحدي بالبيت!!! ولسه ضايل ٣ اسابيع وشوي! المنطقة الحمد لله امان والامان بوجه الله وقريبته ساكنة كتير قريب منا بس عمري في حياتي ما حسيت بالوحدة والغربة متل هالايام! نفسي احكيله ما بدي اتحمل هالمسؤولية!! وخايفة اكون لوحدي لكن كالعادة بضغط على نفسي لحتى ابين قوية وما في اشي بخوفني!! الله يمضي هالايام على خير 

صرت كمان اسمع مزاج اف ام هاليومين عالنت وكل ما تيجي اغنية تذكرني باهلي او الها ذكرى معينة اصير اعيط ! بكتب هالبوست وانا بسمع عبد الحليم حافظ الرفاق يتساءلون

مواقف 5

• رمضان السنة كان اكيد غير عن كل سنة الحلو فيه انه كل اخواني واخواتي كانو مجتمعين لاول مرة ومن فترة طويلة بفضل ربنا اولا وفضلي انا ثانيا!!وغير هيك اول مرة بقضي رمضان دايما طاشة مع اني حاولت اخلص كل امور العرس بس الا يطلع شغلات اخر لحظة بس كانت طشات حلوة ولاول مرة اكتشف انه كل عمان كلها بتكون برة بعد الافطار

• عرسي كان في عيد الفطر واخترت الموعد لحتى يناسب المغتربين جميعا لكن نصيحة لاي شخص بده يتزوج ابعدوا عن ايام العيد !!!!!!!!!! عججججججججققققققققققققة

• غير اني كنت ابكي كل يوم طول الاسبوع اللي قبل العرس بس جد صرت برايدزيللا!!! كان الكل يخافوا يحكوا معي !!! بس جد انا جهزت كل اشي !!! وكله على راسي!! كنت اخر توتر واحلى اشي المعازيم !!! لانه طول عمري بحب عرسي يكون صغير وللناس القريبين جدا فكان بس 130 شخص !!! تخيلوا !!! اكيد في ناس صاروا يعتبوا علي بس مممممم ضربتها طناااااااااش ومرات كانو يضربوا عالوتر جد

• يوم العرس كان هادي بالاول بس نيجي للنصيحة التانية والمهمة كمان يا عروس ما تحجزي في صالون ما بتعرفيه وما تعاملتي معه !!! على الاقل لو تزوريهم او تجربيهم قبل بفترة !! انا حجزت بصالون معروف وشاطرين لكن اول مرة بجربهم ومش متعودين علي ولا متعودة عليهم المهم تطاوشت معهم يوم الحنة ويوم العرس كمان هههههههه بس الحمد لله طلعت عروس محجبة حلوة

• اصعب شيء لمن تطلع البنت من بيت اهلها!! مسكت حالي كتير ما ابكي لكن مع نظرات اهلي وخاصة امي ما قدرت اقاوم !! الامور كانت اولموست بيرفكت بس حظي المنيَل انه كان هوا كتير يومها والعرس كان برة !!!! بس غير هيك ومع الحبايب كلهم حولي !! كل شي كان رائع

• مقابلتي بالسفارة كانت بعد شهر وكنت خايفة كتير ما بعرف ليش !! يومها ضليتني استنى 4 ساعات لحتى اجا دوري !!! لكن مشت الامور على خير ..... كل المقابلة ما اخدت 10 دقائق الحمد لله

• بشوف اللي بسافروا على امريكا بحملوا زيت وزيتون وملوخية ومرمية وبامية وايش ما بيخطر على بالكم يعني تحس رايحين على بلد قاحلة ما فيها اشي !!! انا من شطارتي رديت على زوجي بحكيلي كل شي موجود!!! اوكي موجود بس مش زاكي !!! ومش اي مكان موجود!!! الحكمة من هالحكي انه نزلتي الجاي على عمان رح تكون بس مونة هههههه

• مع انه الي بس شهر والبلد هون حلوة وجد حبيتها بس جد مشتاقة لعمان كتيييييير وللكنافة الناعمة الفريش !!!

وهدا اللي صار معي الاشهر الثلاثة الماضية

مواقف 4

مع انه التدريس أسوأ مهنة في التاريخ وجد متعبة وبدون مردود لا مادي ولا معنوي لكن الأيام الماضية كنت كتير حاسة بالحزن اني رح اترك التدريس وأترك طلابي .... من فترة طلعوا على الاذاعة وشكروني وقدمولي باقة ورد أحمر ودبدوب صغير ! جد ما أزكاهم .... نسوني كل وجع الراس اللي كانوا يسببولي اياه و مبارح كان آخر يوم بالامتحانات جد كان يوم عاطفي لدرجة وقريبا رح أحكي عنه بالتفصيل

عمري ما حكيت عن السواقة وانه جد بخاف منها مع انه سواقتي رايقة ومنيحة المهم مبارح كمان خوفي تحول من مجرد شعور الى حقيقة .... أول حادث بعمله من لما بلشت أسوق ويمكن مش حجة لكن كنت مستعجلة وبدي أصدق أوراق وقرفت من موضوع تصديق الأوراق وما في وقت .... لكن الحق علي انا كنت مستعجلة ومسرعة المهم ضربت السيارة والضربة مش قوية الحمد لله ولكن بما انه التأمين ضد الغير ما حبيت نعمل كروكة وقصص .... لكن للاطمئنان حكيت مع اخوي يتفاهم مع الشب ودفعناله حق التصليحات ومشت على خير... والله لا يعيدها من تجربة

بتحسوا مرات الدنيا كتير صغيرة .... مبارح كمان كان عندي موعد مع منسقة أعراس (يمكن قابلت كل منسقي الأعراس اللي بالبلد وجد شغلة بتوجع الراس) المهم من أول ما شفتها شبّهت عليها (وانا شاطرة في التشبيه وتذكر الوجوه) ... كتير بتشبه شاب كنت أعرفه بالجامعة يعني معرفة سطحية ... المهم أثناء الحديث بتحكيلي انا رتبت عرس أخوي ! انا على طول سألتها شو اسمه وبأي جامعة دارس وطلعت عن جد أخته ... كيف الصدفة!! وحتى ورجتني فيديو من حفلة خطبته ! الدنيا صغيرة كتير

في الاسابيع الماضية دخت وانا أدور على مكتب أو شخص يتكفل بتجهيز عرسي لكن بما اني جد ما بثق باي شخص بسرعة وبدقق على كل التفاصيل وكمان بحب أعمل كل اشي بأيدي مش عارفة استقر على مكان زي العالم والناس وعن جد أسعارهم خيالية !! يعني بستحق ادفع هيك مبالغ ؟ او المسكين خطيبي اللي يدفع انا شو دخلني ههههه المهم اعتقد اني لازم أتوكل على الله وآخد الأمور ببساطة ... كثرة النق بتخرب الشغلة حتى لو كانت بيرفكت

جديد أقنعت صاحبتي مش متزوجة عمرها 37 وبتجنن .... بتشتغل كوافيرة وشغلها كتير طويل ومش كتير شطورة بالانجليزي والكمبيوتر ... أقنعتها انه أجرب أعمللها بروفايل على موقع من مواقع الزواج على النت وطبعا انا ما بعرف شو المواقع اللي زي العالم والناس واللي بكون الموضوع جدي مش بس تسلاي وتخويت !! ما بعرف نصيحتي منيحة ولا أنسى الموضوع ؟!! لانه صدقا البنت ما شاء الله عليها واحلى مني كمان وجد حابه اساعدها ... أمشي بالموضوع ولا شو رأيكم ؟

بعد هدا الاسبوع عن جد لازم أغير جو !!! أسافر أطلع رحلة !!! لاني كتير حاسة مخنوقة وبحاجة للتغيير !!! لو في عنا بعمان بونجي جامبينج !! هههه

بتمنى للجميع نهاية اسبوع حلوة ولا تنسوا تقرؤوا سورة الكهف اليوم وكثرة الصلاة على سيدنا محمد عليه السلام

سلام

مواقـــــــــــف3

يوم الخميس لما انتهى الدوام وكنت مع الطلاب في باص المدرسة كان في طالب طبيعته مشكلجي وهو بصف ثامن بحكيلي شوفي يا مس (مغلف فيه كتاب فصل من المدرسة) وطبعا الطالب بتحسه بحكيها بفخر ... طبعا مع رغبتي بالصمت وعدم سماع القصة لكن سألت السؤال الذهبي .... شو عملت يا مس لحتى فصلوك ؟ ببساطة بحكيلي يا مس شمطت ولد بكس !! مع نظرة فخر كمان !! طيب ليش شو عملّك ؟ ببساطة لانه سألني اذا قلمه في شنتتي وانا حكيتله لأ لكن صار يدوّر بالشنتة !!!! انا ما تحملت وضربته كف صار يلف لف !! لما وصلت البيت وفي وقت لاحق سمعت عن الأحداث اللي حصلت في السلط وعلى طول اجا على بالي هدا الطالب ! لأتفه الاسباب بفتعلوا مشاكل وكأنه مرجلة الضرب وانه اذا تغاضيت عن أي تصرف أو أي خطأ معناها انت انسان مدعوس على راسك وما الك كلمة ! توصلت الى نتيجة وهي انخفاض مستوى الأخلاق عنا بزيادة مؤخرا وضرورة تخصيص وقت للتحدث عن مكارم الأخلاق والتسامح بعد كل المصايب اللي بنشوفها

كلاسيكو تاني بين ريال مدريد وبرشلونة وفوز ساحق لبرشلونة يوهووووووووو .... كانت مباراة نار بس لاحظتوا كيف لاعبي الريال كانوا خشنين في لعبهم زيادة عن اللزوم !! مع ذلك كانت مباراة رائعة .... مبروك برشلونة وعقبال الفوز على انتر ميلان قريبا

مع اضراب المعلمين وكل مطالبهم يبدو انه كله طلع على فشوش سكـّـتوهم بخمس ليرات ولا عشر ليرات ما بعرف بس بالنسبة لحقوق المعلمين !! حقوق مين يابا ؟!! يوم السبت كان في اجتماع في المدرسة وطبعا خبرونا يوم الخميس آخر الدوام وبما انه احنا عالم المفروض ما عنا حياة اجتماعية وكل حياتنا متعلقة بالتدريس يعني اي لحظة بأشرولنا لازم نكون تحت الأمر والطاعة حتى لو كان سبب تافه أو تعليقات مش الكل اله دخل فيها ..... ملاحظتهم انه في اجتماع وخصم 20 دينار للي بتخلف عن الاجتماع وبما انها سايبة وما حد ممكن يراجعهم يعملوا اللي بدهم اياه ليش لأ ...... انا طبعا كان عندي خطط ليوم السبت وببساطة كتبت لن أحضر اطلاقا .... طلعت وشميت هوا ولكن هدا اشي ما بفهموه انه الانسان عنده طاقة تحمل ولازم يخفف عن نفسه شوي ولا بعديها بتفقع معه

اليوم الجو من أسوأ الأيام !! صح ؟ شكله لازم أجدد دوا الحساسية

مبارح كنت في جلسة بنات وجابوا سيرة برنامج بحكي انه اسم الشخص بحدد رزقه وحياته ... يا بتكون سعيدة أو تعيسة كل هدا يتحدد من الاسم وطبعا انه بعض الأسماء يفضّـــل انه ما تتسمى ... أكيد كله علم فلكي ؟ هههه مسكين يا فلك !!انا حكيت ببالي يعني للهالدرجة صرنا ناس ايماننا ضعيف وشيء تافه بنصدقه بالهالبساطة ؟
لكن هيك برامج ما بتستمر لو انه الناس ما بتابعها وبتصدقها

كمان موقف خطر ببالي وانا بشوف بنت الجيران في بيت عمتي نطت بسرعة وغيرت القناه اللي كنا نتابعها (أظني كانت ام بي سي بناقشوا برنامج اسمه الطريق الى امريكا أتوقع !؟) البرنامج من دعايته حسيته تافه وسخيف وبدخل في مواضيع حساسة وأحلى لقطة لمن تكون البنت اللي معهم بتصلي وبعدين بتطلع بشرط وكات لانه يا جماعة الدين في القلب وقناعة يعني عادي نرقص ونشرب المهم داخليا مسلمين ومؤمنين في هذا الشيء - يعني الدين مش ضروري يكون ظاهر أهم شيء- ويبدو انه هاي الفكرة اللي كل البرامج تسعى لترسيخها في عقول الجيل الجديد ... بنت الجيران لما غيـّـرت القناة كانت متشوقة تشوف مين بده يطلع من برنامج ستار أكاديمي وبصراحة البرنامج وصل لدرجة من الانحطاط انه تعبنا من الحكي عنه لكن اللقطة اللي شفتها كانت عن أمهات المشاركين الجليلات والمحجبات بعانقوا أولادهم وبدعولهم الله يوفقهم هههههه هسه بتحكوا يعني لا محجبة عاجبتك ولا مش محجبة ؟!! بس والله مش راكبة على بعض !! طول نهارهم تعبيط وقصص حب وغرام وسخافة وامه بتدعيله الله يوفقه !! طيب في شو يوفقه بالزبط؟
تركيا تفيق من وهم العلمانية ونحن نغوص فيها والحمد لله

الله يرحمنا

مواقف 2

يمكن هي مش كلها مواقف بعضها افكار بس هذا لا يمنع من مشاركتها معكم
:p

مع انه العطلة كانت مملة وبرد وزناخة بس ما بددديييي أداوم !!! بدي كمان ملل ههههه

ما اتوقع في حد بحب الوحدة بأي شكل من الأشكال وانا من هدول الناس .... ما بتحمل اكون في اي مكان لوحدي حتى لو دقائق ... بس الوضع كتير تغير السنتين الماضيتين ..... لما يسافر كل الناس اللي بتحبهم ويكونوا بعاد لازم تتعود تكون لوحدك ... بصراحة كنت دايما اكره اتسوق واللي بطلع معي على السوق كان جد يكرهني بس من جديد اكتشفت انه ما في احلى من انك تتسوقي لوحدك ... يعني ممكن تضلي تلفلفي 3 ساعات بدون ما حد يشتكي وممكن ما تشتري اشي وما حد بستعجلك وبتختاري اللي بدك اياه على راحتك .... وحتى صرت اتعود آكل لوحدي وحلو لانه بس ما يكون الأكل متل ما بدي برجعه وبطلب يغيرولي اياه بدون ما حد يحكيلي خلص كلي واسكتي بلا فضايح أو شو انك سوفاج ههههه .. مممم لونلينيس از نت ذات باد سم تايمز

انضم لعائلتنا فرد جديد وهو سيارة ابوي .... تويوتا هايبرد زغنطوطة بس كتير أمورة ... كأنها من سيارات المستقبل كله تاش سكرين وكبسة باور للتشغيل يعني آخر فياعة ... مش غالية وتوفير بنزين وحماية للبيئة ... ثري ان ون

مرات في اشياء أو مواقف أو معلومات ... ممكن شيء تافه بمر علينا بس بعده كل حياتنا بتتغير ونظرتنا للأمور ما بترجع متل أول ... بس دائما نتمنى يكون التغيير للأفضل ... عن جد احنا عايشين ببساطة وما بنعرف شو اللي بدور حولنا ... بس بتمنى نصحى من سباتنا

بتمنى للكل يوم حلو .... سلام

مـــواقــــف

يمكن معظمها تكون اشياء حصلت معي بالمدرسة لانه بمضي معظم وقتي واكتر المواقف اللي جد ممكن تضحكك او تخليك تعصب هم الصغار

* نظرا لطول يداي الغير طبيعي كل جاكيت بشتريه لازم يكون كمامه قصيرة بس البلايز عادة بتكون طويلة عشان هيك دايما كم البلوزة مبين من الجاكيت مش موضة، بس عشان اخبي ايدي هههههه بس البنات بالمدرسة فكروها موضة وبحكولي يا مس كل البنات صاروا يبينوا بلايزهم عشان يعملوا متلك ههههه كان نفسي احكي ولكم انا ما بلاقي جاكيت طويل عشان هيك البلوزة لحالها بتبين بس سكتت وضحكت

* اليوم وانا بالباص كمان مع الطلاب كان في طالب يابييييي شو نغش !!! اكتر من مرة احكيله مشان الله اسكت !!! بديش تحكي معي !! وقت الترويحة راسي زي الطنجرة ما بدي اسمع حكي خلص !! حتى مرة زعلته مني عشان يتركني بحالي !! زعل يومين بس اليوم التالت آز اف نوثينج هابيند !!! بس يا الله شو بحب يحكي واليوم كانت قواي خاوية فما قدرت أجادله عشان هيك بلش يحكي نكت ..... ههههههه نكت الطلاب اشي بمغص بس هاي ضحكت عليها عشان يسكت ويا ريته سكت .... بحكيلي مرة واحد خطف سريلانكية وأخدها على الصحراء حكتله السرلانكية نو نو انا ما نضف كل هاي الغبرة هههههههه والله مسكت حالي ما امسكه وأزته برة الباص

* يا سلام !! بالنسبة للطلاب هدا الوقت من السنة اصعب وقت عشان الاختبارات بس بالنسبة النا المعلمين عن جد أحلى وقت ..... لا تدريس وترويحة بدري ووقت طويل نعمل اللي بدنا اياه ياااااي

* في حياتي ما حبيت الرياضيات ... كنت أنجح وعلاماتي كتير كويسة بس جد مش مادتي المفضلة ..... مع ذلك درست علمي وحبيت أدرس كيمياء على أساس ما الها دخل بالرياضيات ..... آخ على المصيبة انه 99 % من الكيمياء بدخل فيها الرياضيات ما تسألوني كيف بس أخدت كورسات يمكن أصعب من اللي بياخدوها اللي بدرسوا رياضيات المهم صار بسيط علي ..... بس أحل مسألة صعبة للطلاب ويستصعبوها بسألوني يا مس كيف بتفهمي كل هدا وكنت تفهميه وانت بعمرنا ؟!! بيجي على بالي احكيلهم الرياضيات أزنخ مادة بالعالم وصعبة وانا بعمركم ما كنت أستوعبها بسهولة بس لأكون مثال المعلمة الفاضلة بتبسم وبحكيلهم المسأله سهلة بس فكروا فيها وركزوا معي شوي هههههه يا بيي الكزب هههههه لكن الاشي اللي بعمله زيادة عن معلماتنا اني بضل أعيد وأزيد لحتى غصب عنهم يفهموا

* مرات بنتصرف تصرفات بتكون جدا غبية أو طائشة .... يعني اليوم

نزلت أشتري شوية أشياء ونزلتني صاحبيتي على الشارع الرئيسي يعني مشي بوصل بسرعة بس فضلت استنى تكسي لاني كتير حاملة اشياء وكنت تعبااااانة وهاتي ييجي تاكسي .... المهم اتصلت مع أخوي وشكله يا حرام كان نايم وحكيتله اذا بقدر ييجي ياخدني وحكالي شوي وبوصلك بس ما بعرف شو اجا على بالي لما شفت تاكسي وقفته واكيد اتصلت مع اخوي انه انا جاي بلاش تغلب حالك !!!! طيب صحيته من النوم وشغل السيارة وخلص صرت مغلبته ليش ما استنيت شوي !! بس غلبته عالفاضي وخسرت حالي ليرة ههههه والله مش زعلانه على الفلوس بس جد استهبلت حالي بس وصلت عالبيت .... الحمد لله انه اخواني رايقين لو انا منه بخلص علي ههههه

* عملت كوكيز مبارح وأول مرة بجرب أعملها ... طلعت زاكية وخلصوا هههه رح اكتبلكم الوصفة قريبا بس بدي أعمل تعديلات عليها لاني بحب الكوكيز اللي بكون طري مش المقرمش

* كتير نفسي أسافر أو اطلع رحلة أو اعمل اي تغيير بس بنفس الوقت مش حابة أعمل اشي هههه ما بعرف شو هدا الشعور المتناقض بس جد هدا شعوري

* كل مرة بدي اكتب موضوع بالعربي يا بكتب جملتين بساعة أو بشبك كي بورد مع اللاب توب لانه الأخ ما فيه أحرف عربي اوووفتت

* اليوم سمعت مقطع من أغنية هاني شاكر أصاحب مين ... جد زمان ما سمعتها .... شو روعة

و بــــــــس