موسم الأعراس

بعد طول انتظار أخيرا حددت موعد العرس وأكيد لازم أبلش التحضيرات وكله على عاتقي بما انه الاستاذ مسافر وانا اللي لازم أختار وأقرر !! وصدقا لما يحكولك العروس بتكون بحالة هستيرية ما كذبوا !! يعني العرس بعد اربع أشهر قلت في بالي على اساس يكون خافف الضغط وموسم الأعراس بخف بس شكلوا كل الناس بفكروا متلي !!! المهم انا حابه العرس يكون جدا بسيط لكن كلاسي وحلو يعني مش صاله عادية الساعة طنعش يبلشوا يطرّوا بالعالم ولا فندق ندفع فيه عشر آلاف دينار يعني اشي ومنه ..... وكعادتي كنت حاطة ببالي مكان رائع أوت دور وشجر وهدوء وسعره مناسب بس احنا البنات كعادتنا لازم اللفلفة والتعب بس لحتى اكون مقتنعة انه أفضل مكان وان شاء الله يكون هو أفضل مكان

الصدمة اللي فاجأتني انه معظم الأماكن ما بقدموا الا الموقع والطاولات أكيد والضيافة وانا لازم أوفر الدي جي والتصوير والورد وكمان الاضاءة !!!!؟؟؟ وانا شو بعرفني شو الاضاءة المناسبة !!؟؟

المهم اكتشفت كل الكماليات هي اللي رح تغلبني والمفاجأة التانية اللي ما كنت حاطاها ببالي انه رح تكون أغلى من حجز المكان نفسه؟!! والكماليات حدّث ولا حرج !! المكان اللي حجزت فيه حكالي المسؤول عنه اني أمر بيوم بكون فيه عرس وانه أشوف التجهيزات اللي محضرينها واختار اللي بدي اياه .... كان جدا رائع ورايق .... طبعا كان متولي الأمر متعهد حفلات ما أحلى وجودهم انه يتكفّلوا بكل شيء لكن لازم أختار أكتر شيء مناسب وانه ناس يعتمد عليهم .... ادعولي واللي عنده خبرة أو أي فكرة يحكيلي

:D

وبلّش موسم الأعراس في عمان هلأ كل الشوارع سيارات وزمامير والصالونات ببطلوا يستقبلوا حد هههه

الله يوفق الجميع