العنف في المدارس

الموضوع بهمني بما اني معلمة ..... وأنا بستغرب أكتر من أي شخص ثاني لمن أسمع عن حوادث بتصير في المدارس مثل فقدان طالب لعينه بسب ضرب معلم له !! أو معلمة حاولت اسكات فتاة صغيرة بوضع قماش على فمها ..... لكن صدقا من ناحية تانية لازم أعترف انه أولاد هالأيام بأخلاقهم وعنادهم وجد مرات قلة الأدب اللي فيهم بيخلوك تنجن !! والأهالي بحسوا المعلم عبد للطالب أو لابنهم بالذات !! وبتعرفوا انه معظمهم بيحكوا لأولادهم ما تسكت للمعلم ورد عليه حتى لو كنت على خطأ لانه ما بقدر يضربك وبتعاقب اذا ضربك !! ومع كل الأشياء اللي مطلوبة من المعلمين من وزارة التربية والتعليم والضغط كله مقابل راتب ما بنحكى فيه !! مين ما بده يفقد صوابه !! أكيد انا ما بشجع على العنف لكن في أسباب كتيرة ومنها عدم راحة المعلمين وشعورهم انه ما في تقدير لأي من جهودهم !!؟

من يومين تعرضت لموقف بالمدرسة انه بنت يعني نحكي كان أسلوبها بالحكي غير لائق .... أنا حاولت أمسك أعصابي ومع اني دائما بعالج أي موقف بأسلوبي لكن يومها كان وقت الترويحة عشان هيك صبـّـرت حالي لتاني يوم ووجدت أفضل أسلوب اني ألجأ للأدارة بما انهم دائما بخبرونا نرجعلهم في هيك مواقف ! انا ما عرفت شو الأسلوب اللي رح يتبعوه معها لكن عرفت انهم فصلوها لمدة يومين الى حضور ولي أمرها وبعد يومين اجت داومت عادي! كأن شيئا لم يكن وطبعا بما انه نحن ملائكة لازم أسلوبي ما يتغير معها وهدا اللي كان .... اللي بتمناه انها تكون تعلمت درس من هالموقف وتعلمت الاحترام .... مع انه أولا وأخيرا هدا شيء نابع من التربية

مع اني بحب التدريس وهو سبحان الله بحسه هبة أو هواية يعني ممكن يكون الانسان معلم مبدع بدون دورات ولا خطة تدريس لانه بقدم كل اللي عنده بأبسط طريقة وباسلوب حلو من قلبه ولأول مرة بحكيها أنا عندي من زمان هبة في التدريس وتبسيط الأمور حتى من لما كنت طالبة بالمدرسة لكن مع ذلك ان شاء الله مع نهاية هدا الفصل رح أنهي حياتي المهنية كمعلمة لانه اكتشفت انه التعليم هالأيام مش رسالة وانما ارهاق وتعب مع ارتفاع بالضغط مبكر وبدون مقابل أو تقدير