Tuesday, August 03, 2010

أمانة عمّان والصيف

ما بعرف انا الوحيدة اللي بتلفت انتباهي هالشغلة ولا لأ ...... بتلاحظوا انه في عمان ما ببلش الحفريات وشغل الانفاق ومشاريع خيالية الا فترة الصيف ؟؟؟ طيب يا عمي عشان الصيف الجو لطيف وما في مطر لكن حبكت في شهر سبعة ؟؟ انا وضعت عدة احتمالات لتفسير السبب

اولا عمان حابة تقلل عدد السياح والزائرين بخنق العالم بالأزمة وتطفيشهم

او انه معتمدين على المصاري اللي بدخلها الزائرين فترة الصيف لهيك ببلشوا يشتغلوا بعز الصيف (والله أعلم الضرائب وين بتروح) ويريت بكون شغل زي العالم والناس ! الحفر بالشارع رمز اردني لا يتغير

الاحتمال التالت انه حابين نظهر للعالم انه احنا ناس شغّيلة وشوفو بعينكم عشان هيك واجهة الاردن طريق المطار لا يطاق

حد يحكيلي اذا انا غلطانة وفي حسابات تانية

6 comments:

Whisper said...

اول شي الحمد لله على السلامه...زمااااااااان هالقمر ما بان
بس يلا معذورة علشان تحضيرات العرس....التمام على خير يا رب :)

ما الها تفسير بصراحه :$
يعني عنّا للسنه الثالثة على التوالي بحفرو نفس الشارع و بسكروه و بعملو تحويلات كل صيف, مش فاهمه كأنه فلوسهم زياده هالجماعه , او انهم بدهم يبينو ان احنا دايما نسعى للتطور :$ عأساس انه تطور

SimSim said...

هلا وغلا !! والله اشتقت لمدونتي والكم كلكم !! بس زي ما حكيتي جد مش فاضية أحك راسي ورمضان ان شاء الله ييجي على خير بس عجقني جد :D

انا عارفة مين المهندسين ولا المسؤولين عن كل هالخبايص !! يريت بكون اشي زي العالم والناس

موااااه مبسوطة بشوفتك
:)

العبيط said...

الشارع اللي عنا زفتوه الصيفية الماضية و كان نفسو الواحد يتدحدل عليه

من اسبوعين اجو حفروه عرضا و طولا عشان خطوط الكهربا ، و المشكلة انو شفتهم حطوها سلاك الكهربا مكشوفة فوق خطوط المي
و هسة شكرة المي بتولول

بيشتغلو بالصيف كثير عشان قال المدارس و الجامعات معطلة و الاجازات كتير
:)

SimSim said...

أصلا طلاب الجامعات والمدارس بكونوا مضبوبين في الدوام مش فايعين ... واذا على الباصات يعني ما اتوقع رح تعمل أزمة زي اللي صايرة هلأ

Rula A. said...

الثلاثة إحتمالات وارده.. أكتر شي مزعج لما يسكرو شارع عليه حركه كتير زي قبل فتره لما كانو بزفتو شارع عبدالله غوشه.. كان مأساه.. كانو يسكرو الجسر إلي بودي على مجمع جبر..

SimSim said...

Rula: وفي عز الازمة !!! والله ما بعرف كيف بفكروا