Sunday, April 11, 2010

مواقـــــــــــف3

يوم الخميس لما انتهى الدوام وكنت مع الطلاب في باص المدرسة كان في طالب طبيعته مشكلجي وهو بصف ثامن بحكيلي شوفي يا مس (مغلف فيه كتاب فصل من المدرسة) وطبعا الطالب بتحسه بحكيها بفخر ... طبعا مع رغبتي بالصمت وعدم سماع القصة لكن سألت السؤال الذهبي .... شو عملت يا مس لحتى فصلوك ؟ ببساطة بحكيلي يا مس شمطت ولد بكس !! مع نظرة فخر كمان !! طيب ليش شو عملّك ؟ ببساطة لانه سألني اذا قلمه في شنتتي وانا حكيتله لأ لكن صار يدوّر بالشنتة !!!! انا ما تحملت وضربته كف صار يلف لف !! لما وصلت البيت وفي وقت لاحق سمعت عن الأحداث اللي حصلت في السلط وعلى طول اجا على بالي هدا الطالب ! لأتفه الاسباب بفتعلوا مشاكل وكأنه مرجلة الضرب وانه اذا تغاضيت عن أي تصرف أو أي خطأ معناها انت انسان مدعوس على راسك وما الك كلمة ! توصلت الى نتيجة وهي انخفاض مستوى الأخلاق عنا بزيادة مؤخرا وضرورة تخصيص وقت للتحدث عن مكارم الأخلاق والتسامح بعد كل المصايب اللي بنشوفها

كلاسيكو تاني بين ريال مدريد وبرشلونة وفوز ساحق لبرشلونة يوهووووووووو .... كانت مباراة نار بس لاحظتوا كيف لاعبي الريال كانوا خشنين في لعبهم زيادة عن اللزوم !! مع ذلك كانت مباراة رائعة .... مبروك برشلونة وعقبال الفوز على انتر ميلان قريبا

مع اضراب المعلمين وكل مطالبهم يبدو انه كله طلع على فشوش سكـّـتوهم بخمس ليرات ولا عشر ليرات ما بعرف بس بالنسبة لحقوق المعلمين !! حقوق مين يابا ؟!! يوم السبت كان في اجتماع في المدرسة وطبعا خبرونا يوم الخميس آخر الدوام وبما انه احنا عالم المفروض ما عنا حياة اجتماعية وكل حياتنا متعلقة بالتدريس يعني اي لحظة بأشرولنا لازم نكون تحت الأمر والطاعة حتى لو كان سبب تافه أو تعليقات مش الكل اله دخل فيها ..... ملاحظتهم انه في اجتماع وخصم 20 دينار للي بتخلف عن الاجتماع وبما انها سايبة وما حد ممكن يراجعهم يعملوا اللي بدهم اياه ليش لأ ...... انا طبعا كان عندي خطط ليوم السبت وببساطة كتبت لن أحضر اطلاقا .... طلعت وشميت هوا ولكن هدا اشي ما بفهموه انه الانسان عنده طاقة تحمل ولازم يخفف عن نفسه شوي ولا بعديها بتفقع معه

اليوم الجو من أسوأ الأيام !! صح ؟ شكله لازم أجدد دوا الحساسية

مبارح كنت في جلسة بنات وجابوا سيرة برنامج بحكي انه اسم الشخص بحدد رزقه وحياته ... يا بتكون سعيدة أو تعيسة كل هدا يتحدد من الاسم وطبعا انه بعض الأسماء يفضّـــل انه ما تتسمى ... أكيد كله علم فلكي ؟ هههه مسكين يا فلك !!انا حكيت ببالي يعني للهالدرجة صرنا ناس ايماننا ضعيف وشيء تافه بنصدقه بالهالبساطة ؟
لكن هيك برامج ما بتستمر لو انه الناس ما بتابعها وبتصدقها


كمان موقف خطر ببالي وانا بشوف بنت الجيران في بيت عمتي نطت بسرعة وغيرت القناه اللي كنا نتابعها (أظني كانت ام بي سي بناقشوا برنامج اسمه الطريق الى امريكا أتوقع !؟) البرنامج من دعايته حسيته تافه وسخيف وبدخل في مواضيع حساسة وأحلى لقطة لمن تكون البنت اللي معهم بتصلي وبعدين بتطلع بشرط وكات لانه يا جماعة الدين في القلب وقناعة يعني عادي نرقص ونشرب المهم داخليا مسلمين ومؤمنين في هذا الشيء - يعني الدين مش ضروري يكون ظاهر أهم شيء- ويبدو انه هاي الفكرة اللي كل البرامج تسعى لترسيخها في عقول الجيل الجديد ... بنت الجيران لما غيـّـرت القناة كانت متشوقة تشوف مين بده يطلع من برنامج ستار أكاديمي وبصراحة البرنامج وصل لدرجة من الانحطاط انه تعبنا من الحكي عنه لكن اللقطة اللي شفتها كانت عن أمهات المشاركين الجليلات والمحجبات بعانقوا أولادهم وبدعولهم الله يوفقهم هههههه هسه بتحكوا يعني لا محجبة عاجبتك ولا مش محجبة ؟!! بس والله مش راكبة على بعض !! طول نهارهم تعبيط وقصص حب وغرام وسخافة وامه بتدعيله الله يوفقه !! طيب في شو يوفقه بالزبط؟
تركيا تفيق من وهم العلمانية ونحن نغوص فيها والحمد لله

الله يرحمنا

13 comments:

Shaheen said...

Barcelona is the best, I'm still happy from the last night.

its the official end of RM ya 7aram sho sar fehom. arrogant ronadlo was locked by Valdis ..yisid valdis he was a wall agaisnt them

SimSim said...

Shaheen: والله مش بس لمجرد التعليق لكن ما بعرف كيف أغلى لاعب في العالم ! يعني اللعب الحلو بكون بالتمريرات الرائعة بين اللاعبين والتعاون هو بتحس بلعب لوحده ! انا كتير بنبسط على برشلونة في هاي الشغلة في بينهم تعاون رهيب

لأ ومشجعي الريال شو بحكيلك المهم مسحنا فيكم الأرض هههههه وراسهم بالأرض ههههه انا ما بجادل طبعا لأنهم عارفين حالهم

المهم وووهوووووو

LioneSS said...

مرحبا :)

انا دايما بمر هون بس عمري ما علقت بس بصراحة القصة الاولى اثارتني. الطالب الاول اكيد غلطان عشان ضرب الثاني. بس بصراحة الثاني هو البادي بالغلط.
حكالك انه القلم مش معه لشو تتمادى و تمد ايدك على شنطته و تفتشها
1) غلط بتكذيبه
2) غلط انه مد ايده على شنطة الغير
بدون اذن
3) استباح خصوصيات الغير
أنا اللي هلأ عم افكر فيه انه الطالب الثاني تعاقب اول لأ

مره تانيه انا مش مع الضرب بس هاي الافكار اللي براسي حاليا

الطالب الاول - الشعب العربي
الطالب التاني - امريكا او اسرائيل
القلم - اسلحة الدمار الشامل

و تخيلي السيناريو

اذا حكينه ان الطالب الاول ما كان مفروض يضرب او يأخد اي اجراء

زي ما بنحكي انه الدول العربيه لازم ترضخ لتفتيشها من قبل امريكا او اسرائيل بدون اعتراض

طب احنا هيك عم بنمي روح الخنوع و الخضوع عند الجيل الجديد. بنحكيلوا يروح يشكي للإدارة و الادارة ما رح توجع راسها و رح تلفلف على الموضوع انه مش شي مستاهل

بالزبط زي ما عم بصير بالواقع. الدول العربيه عم بتروح تشكي للامم المتحدة و عم بتلفلف الموضوع عشان ما توجع راسها.

و الله عني بطلت اعرف شو الصح و شو الخطأ
برأي الخاص الطالب التاني هو المفروض ينفصل مش الأول.

البادي اظلم

Shaheen said...

this sums up the match story

http://www.osamahajjaj.com/thumb3/thumb615.jpg

loooooooool

حمزة الشعراوي said...

عنجد شغلة الأخلاق هاي صايرة اشي غلط في الانسان
مش بحكو المحترم بركبوا الناس ؟
و مهو محترم بعملش اشي
مهو محترم بسويش اشي
مهو محترم بحكيش اشي
و معك حق, هلا كتيير منا على مبدا العلمانية بشتغلوا, بتزكر شغلة, بحكيلك واحد مصري, راح على المسجد و طلع منه راح عالخمارة, حكوله معقول من المسجد على الخمارة
جاوبهم : ماهو ده فرض,و ده كيف !
يعني انا بصلي و بصوم, بس بشرب أو مصاحب أو أو أو أو
الناس بطل عندها لا حيا ولا شرف
بتزكر برضو انه لما هند بن عتبة اسلمت, وكانت مع الرسول(ص), فحكالها انه ما بترتكبي الفواحش, فهي عصبت و حكت : وهل تزني الحرّة ؟
انا حرة بدك اياني ازني ؟ الزنا بس
مع الجواري بكون !

و بعدين المتخلف تاع السلط و
المتخلفين التانيين اللي راحوا و كسروا المحلات
بتعرفي هدا كلو من شو ؟
لانو الحكومة فالتة الحبل على الغارب الهم
مفكرين اذا هو ابن العشيرة الفلانية معناتو بساوي شو ما بدو و كلها بفنجان فهوة بتنحل و بلا قانون بلا بطيخ مبسمر
لو الحكومة تطبق القانون عليهم و الله بصيرو زي الارانب ما حدا بسترجي يفتح تمو مع حدا
بس ملاحظة: انا بعرف ولاد,ابو مربي انه اي مشكلة بتنحل بفنجان قهوة , ساويها و ما عليك,يعني ما عليك القانون بمشيش علينا ! وكمان شغلة, انا ما بحكي انه الكل هيك, بس العقلاء منهم لازم يساوولهم شغلة مع التيوس !

آسف اني طولت بس الشغلة بتسم البدن
سم !
سم الهاري اللي يسمهم كلهم !

Rula A. said...

..لازم حل جذري لهاي المواضيع

SimSim said...

LioneSS: والله لو يسمعوك الطلاب بكيفوا ههههه وببلشوا ضرب عن جنب وطرف !! ما أتوقع التشبيه سليم لانه كان ممكن تنحل المشكلة بدون الضرب لانه عمره الضرب ما بحل شيء وانا لو انه أجا وحكالي مد ايده على شنتتي أكيد بتخذ اجراء ضد اللي مد ايده سواء عقاب أوفصل لكن لو كل طالب بده يفكر في هاي الطريقة معناها مصيبة !! يعني مبدأ اللي بضربك أضربه !!؟ وللأسف هيك الأهل بعودوا أولادهم وهدا اللي بنشوفه حاليا

SimSim said...

LioneSS: صحيح أهلا وسهلا ودائما بدي أقرأ تعليقاتك

:)

SimSim said...

Shaheen: looooooool rahebeeeeh !!! 100% true :D

SimSim said...

Sha3rawi: شغلة العلمانية هاي موضوعها كبير كتير وبينشغل عليه على مستويات عالية والله

وبالنسبة لفنجان القهوة والله بعتقد لو ما تنقبل العطوات وما حد يتنازل عن حقه مشان فلان وعلتان يمكن بخف الوضع وبفكر الواحد 100 مرة قبل ما يعمل اي شغلة مقابل فنجان قهوة

ولو البيت بيتك احكي اللي بدك اياه

:D

SimSim said...

Rula: أولا وأخيرا كلها بترجع للتربية وثانيا للمحسوبية كيف بدن نحل هالمشاكل عاد ؟؟

Amjad Wadi said...

بصراحة انا مش عارف شو دخل كرة القدم بالمواضيع اللي ذكرتيها

:)

انا طلقت التشجيع بحماس من أكثر من 15 سنة
بس يبدو انه بديت ارجع اتابع مباريات مؤخرا لانه بباسطة ما فيه اشي ثاني الواحد يتابعة
كل اشي حوالينا بسم البدن
فخلينا نلتهي بالنباريات احسن

افتحيلك مدونه للنعجبين ببرشلونة
:)

SimSim said...

Amjad: أهلا أهلا !! شو هالغيبة !! نوّرت والله

وعلى رأيك ما اله دخل بالمواضيع بس فكرة مواقف عندي انه مواضيع ما الها دخل ببعض بس بتمر علينا كل يوم .... ولاحظت انه فوز برشلونة الموضوع الوحيد المفرح عشان هيك خلينا نفرح يا عمي حتى لو اشي مش من بلدنا
:D

وفكرة رائعة أعمل فان كلوب لبرشلونة بتنضم للجروب ولا خائن من مشجعي ريال مدريد؟؟؟ ههههه