Tuesday, September 01, 2009

أوّلــــــه رحــــمــــة

ملخص أول عشر أيام من شهر رمضان

غير انه الوقت مر كلمح البصر ... الحمد لله كنت متوقعة يكون رمضان صعب مع الحر والوقت الطويل لكن لحد الآن من أجمل الايام .... اخواني بشاركونا رمضان لاول مرة من سنوات طويلة وهدا اعطى الشهر نكهة أجمل

اول يوم كنا معزومين عند بيت خالي وهاي اول مرة بنفطر فيها برة البيت لانه التقليد عنا انه فطور عمّاتي وأخوي المتزوج بكون ببيتنا اول يوم ... بصراحة بفضل تقليدينا

يوم 30 -8 .... هدا اليوم انا كتير مبسوطة او لأ ؟؟ صراحة ما بعرف لانه يومها كان دوام المدارس بس انا قررت ما أرجع للتدريس ... جد كان لمن يقرب الدوام احس زي الطلاب انه شعور زفت هههه مش كأني انا معلمة لأ كأني طالبة وكان شعور مش حلو وانا مليت صراحة لذلك نو موووور تيتشينج الا اذا فقعت من الملل الله أعلم ههههه

من كتر العزايم واختي عنا من اول رمضان وكذلك أخوي ومرته وأخوي التاني اللي مش متزوج .... ما شاء الله عجقة !! حاسة اني مقصرة بقراءة القرآن وبتمنى انه اتدارك اللي راح علي قريبا ..... يلّا كمان اسبوع مسافرين :(

اما الحدث الاهم .... يوم الجمعة كنا معزومين على الافطار ببيت عمتي واحنا ما شاء الله كتار بالبيت مع المغتربين ... حضرنا حالنا وكنا 3 سيارات وأمّنّا البيت ... انا رجعت تأكدت من البيت 3 مرات وقرأت الدعاء المعتاد "اللهم اني استودعك البيت يا من لا تضيع عنده الودائع وانت خير الحافظين" ..... أفطرنا عند عمتي وقضينا يوم حلو حتى انه طوّلنا !! يمكن للساعة 1 بالليل ....

المهم واحنا بطريقنا للبيت وقبل ما نوصل ب 500 م اتصل اخوي بسأل اختي .... في فلوس بغرفتك أو ذهب ؟؟!!! طبعا احنا اللي كنا بالسيارة صار عنا تجمد دماغي وكل واحد صار يفكر بالاشياء اللي بالبيت ... أنا ما فكرت بغرفتي واللي فيها !! راح بالي على التلفزيون ال42 بوصة اللي ما النا اسبوع جايبينه وغير التلفزيون الموجود من اول ولا اللاب توبس المرميين هون وهون !! يا حبيبي ..... بعدين تذكرت !! ...... وغرفتي !!!!!

بس وصلنا كان موجود سيارة شرطة مدنية وطلبوا منا ما نلمس اشي ونضل بمكان معين .... التلفزيونات بمكانها !! والكمبيوترات كمان !! .... بس القيت نظرة على غرفة امي وابوي وغرفة اختي ناكشينهم ومش تاركين اشي بمكانه !!!! مصعوقين !!! انه رمضان الدنيا !!! والغباء بالموضوع وأكيد بنحمد ربنا على غبائهم انه كل الالكترونيات مكانها والكمبيوترات مع انها سهلة الحمل وجد مرمية هون وهون والحمد لله انه ما بنترك فلوس بالبيت بس في أكمن قطعة ذهب لامي اخدوهم الله لا يوفقهم وغرفة اختي ما كان فيها اشي ....

والحمد لله انهم ما دخلوا غرفتي !!!! الله عمى ضوهم عنها ولا كانت مصيبة !!! وصلت سيارة البحث الجنائي بعد ربع ساعة واخدوا البصمات وسألوا عن كل اللي مفقود .... كان آكشن الله لا يذوّقه لاي شخص .... اللي بضحك بالموضوع انه الخدامة اللي عنا بتفنــّـص بتحكيلي ماما اسمى هدا سي اس آي جوردان !!؟! هههههه من كتر ما بجننها بمسلسل سي اس آي هههههه بس احنا نسينا كل اشي وحششنا ضحك عليها

رمضان حلو بكل اشي فيه ...
ارحمنااللهم برحمتك

4 comments:

Whisper said...

مش خبريه والله
الله لا يسامحهم بستغلو متل هيك عجئه علشان يبسرقو

الحمد لله على سلامتكم وسلامه الاجهزه الالكترونيه :)

فعلا مرو هالايام بسرعه والحمد لله ما في تعب لولا الفلوزه :"( يلاا الحمد لله كله اجر وعافيه ان شاء الله

الله يهنيكم يا رب, من زماااااااان ما اجتمعت العيله عنا برمضان :"( بعد العيد اخوي وعيلته جايين ان شاء الله يلااا ولا البلاش
الحمد لله

SimSim said...

whisper: سلامتك الف سلامة .... الله يعينك انفلونزا وشوب وصيام !!

هو مع السنوات الجايه بصير رمضان بنص الصيف يعني بكونو كلهم موجودين ...... الله يجمعكم عالخير

ĐàŋdŎöŅёH said...

simsim sorry r7 atla3 3n el-na9 , bs i was checking ur blog today , and i realized that u got engaged almost a yr ago !! i dont know why i remember this occasaion sometime in february or march .. !!!
ma32ool el-wa2et sho 3m bimro2 bsor3a ..

allah yehaneeki ya rub :)

SimSim said...

ĐàŋdŎöŅёH: shoftee shoo bemmor bsor3aa !! in a month it will be a year yes !! 6awalet walla :D 5alas lazem atzawaj :D

allah yese3dek yaa 3asal w 3o2balek bas ma t6awlee metlee :D