Tuesday, April 21, 2009

وليش السيارة طلعت ريحتها وانشطبوا الفرامل !!!؟؟

هدا يا جماعة الخير وبلى طولة السيرة صارت معي مغامرة بأول مرة بسوق فيها السيارة !

الموضوع صار من 9 أشهر تقريبا يومها كان لازم أروّح انا وأهلي من بيت عمتي بالهاشمي لبيتنا باليادودة !!! لانه اخوي اضطر يروح مشوار مع اصحابه وما في حد بسوق اللي الأباضاي سمسم .... اللي ساقت 3 مرات من اول ما اخدت الرخصة ومعظم الأوقات كان أخوي بده يخنقني ويزتني من السيارة وانا بسوق معه (ولا يا عمي أزعر سواقة بتوقع اكون زيه من اولها ؟) المهم طلعنا بالسيارة الاوتوماتيك !! وكان ابوي جنبي ومعي اختي و امي ومرت أخوي الحامل بالشهر الثامن !!!! لأ ما كان خافف عقلي من الخوف بالمررررة !!!! ابوي بحكيلي يلا توكلي على الله يابا وانا في بالي صرت أدعي بسم الله الذي لا يضر مع اسمه شيء في الارض ولا في السماء وهو السميع العليم كانه بدي اروح اجاهد !!! ههههههه يلا شغلت هالسيارة واعطيها ريفيرس يا بنت وامشي كلهم 15 ولا 17 كم مش اشي هههههههههه

ماشيين بأمان الله .... يا الله عندي احساس انه السيارة مش مزبوطة !! وطريق وادي الرمم بككككرررررره كله حفر وزنخ !!! ابوي طلع من صمته .... يابا بـُــستي كل الحفر اللي بالشارع ابعدي عنهن شوي !!! بس يابا السيارة مالها اشي !!! و انا ببالي (مطول الطرييييقققق) ... بعد شوي !! صرت اشم ريحة كاوشوك !! وحاولت اوقف عالاشارة مش ماسك البريك !! يا جماعة والله ما هو مني !! وجد خفت ! مرت أخوي الحامل هاي كوم لحالها !! يا حبيبي ... المهم كمـّـلت والسيارة حاسيتها مهورة ... يلا قربنا عالبيت .... حاولت ما أسرع .... يا رب نوصل بالسلامة واول ما اوصل رح اصلي ركعتين شكر لله !! وبعد طوش مع البريكات وريحة السيارة حسيتها خلص انشعطت وصلنا البيت !! صمت قاتل الكل نزل وانا لسة ..... حسيت جسمي فيه قطرة دم وحدة اللي ضلت .... الحمد لله الف مرة .... نزلت من السيارة ودخلت غرفتي وصليت ركعتين شكر لله

بعد شوي اجا اخوي انا فعــيــــَت فيه على طول،السيارة ابصر مالها والفرامل خربانة و ما بعرف شو فيها .... شو مالها ؟ طيب اعطيني المفاتيح اشوف !! وصار يفحط فيها ويخَــمس ... صحيو علينا كل الجيران ...

رجع بحكيلي ما شاء الله عليها السيارة الفرامل تمام ومالهاش اشي ..... بعدين سكت شوي صغيرة واعطاني نظرة استخفاف !!! بالله عليك يا اسمى ما انت ناسية تنزلي الهاند بريك ؟!!!!! Photobucket Photobucket PhotobucketPhotobucket(بس حكاها بصوت واطي عشان سمعتي هههههه) انا وقتيها بلللللمت و قطرة الدم اللي كانت لسة موجودة نشفت ..... شو ؟!!! لا يا زلمة شو ما نزلتها Photobucket اكيد نزلتها ؟ في بالي طبعا ما كنت متذكرة شو اللي عملته .... رحت على غرفتي وحاولت اتذكر الوقائع والأحداث Photobucket وبالآخر اتس آل كومينج باك تو مي ناو Photobucket سقت من الهاشمي لبيتنا ابو 15 كم ومعي 5 أرواح بريئة والهاند بريك مرفوع Photobucket وكله من اللخمة والخوف !!! هههههههههه ومن هداك اليوم ما حكيت لحد عن هالموضوع ولسة اهلي بفكرو انه السيارة كان مالها اشي او انا كنت مرتبكة ... وصحيح بعد اسبوع غيرنا فرامل السيارة ما بعرف اذا كان اله علاقة بالواقعة ههههههههههه

بعدها بيومين مرت اخوي طلبت مني اوصلها عند اهلها - فكرتها انجنت بعد اللي صار تطلب مني ؟ - بس انبسطت انها طلبت جد حسيت انه رجعتلي ثقتي ... المهم كنت آخر روقان ومن بعدها صرت حذرة اكتر وهسه جد حريفة سواقة بس ضليت فترة كل ما اطلع بالسيارة وامشي فيها شوي الا ارجع اتأكد من اني منزلة الهاند بريك ههههه

انا اسمي خديجة حسنين محمود حنفي
Photobucket -اذا كان شرطي سير بقرا وحب يسحب رخصتي

Photobucket
....

9 comments:

vagueraz said...

هاهاهها,, يا أسمى ,,..
هادا الخوف هوة السبب ...
عادي مرات الواحد من اللخمة بينسى أشياء كتييرة ,, لول ,,,,

و بتصير بأحسن العائلات :) لووول

vagueraz said...

yay ana awal comment :) ...


ma bytla3leee hadyeh ??? :Pp LOL

SimSim said...

razan: bet7ebbe a5dek laffeh besayaraa ? a7laa hadyeeeh loool

maroo said...

hahahahahahha walahe enek nahfeh ya asma :) m32ooooool kol had sar waaaaaaaaaaaaaal !!! LOOOOOOL
WALAHE da7teene mn albe :) wbma enek 7areefet swa2a hala 5alas sam7nakee :)

Whisper said...

انا اول ما قرأت حكيت اكيد ناسيه الهند بريك...مش على اساس اني فناااانه سواقه...بس لاني مريت بهالتجربه اول ما اخدت الرخصه :$
فتأكدي ان اخوكي برضه عرفها من تجربه سابقه :)

SimSim said...

maroo: 6ab kwayes sama7 hassa :D

whisper: really ?? looool wallahee raya7tenee lool mesh la7alee ya3neee :D fekrek sarat ma3oo ? yemken bas akeed mesh ra7 as2aloo :D

vagueraz said...

yes ,, wafa2et laffeh b le car .. :)

Sam said...

ah poor little car...7aram 3aleeki...it is very hard to not notice that thing sticking...bas ya3ni i understand...i'd do that same if i had to drive in jordan..

SimSim said...

razan: 5alas deal :D

sam: it is very hard to forget !it's a basic thing :D bas ella5meh 5alas !! lool and yaa it's very difficult to drive in jordan but i am doing fine really :D