Thursday, April 08, 2010

هـــــــدول كلهم دواويــــن وزعرنجية

عيلتي الكريمة موزعة بين الأردن والامارات .... لكن بحسهم ناس غير في الامارات !! يعني بطلعوا كل اسبوع على حديقة بشووا أو بطلعوا عالبحر أو حتى بتجمعوا في مول مع الأولاد لكن هون في عمان ؟!! بيتوتيين !!!!! مع انه الجو أحلى بس ما بعرف هدا الاعتقاد انه الناس اللي بطلعوا في عمان يتنزهوا أو يشووا برة انهم زعرنجية وبس طالعين يتخوتوا ويطقّسوا على العالم !! مع انهم كلهم عائلات !!؟

الجمعة الماضية كانت محاولتي الألف لأقنع اخواني انه بدل ما نشوي في بيتنا نطلع على مكان حلو ولكن ردهم الاعتيادي !! سيبك كلهم دواوين وبعلّقوا !! خلونا بالدار أحسن !! الرد الاعتيادي
!! المهم كان يوم حلو مع وجود أخوي اللي اجانا زيارة قصيرة من دبي وعن جد انبسطنا كتير فيه ... زي اللي ردلّنا الروح بجيّته ! وطبعا كنا حابين كمان نطلّعه وأكيد لا سينما ولا كوفي شوب !! بدنا شيء مميز ومش موجود هناك .... أكتر شيء كان حابه انه يصور مناظر الطبيعة في عمان في هذا الوقت من السنة واحنا زي الجاهلين ما بنعرف وين نروح وكأنا جداد عالبلد .... المهم أحلى مناظر صورها كانت للمنطقة اللي ساكنين فيها عن جد مع اني بمر منها كل يوم لكن ما كنت أتمعن بجمال الطبيعة اللي حولينا






وأكيد أخذناه لفة طويلة بالسيارة جهة الغور والشونه الشمالية لحتى وصلنا السلط






بكرة كمان عنا حفلة شواء للعيلة كلها .... طبيعة عمان هالايام لا تقاوم ... ما شاء الله

5 comments:

Ahmad Hamdan said...

عمان في القلب يا سمسم, خليتينا نشتاق لعمان

Whisper said...

ما شاء الله الصور بجننو :)


احنا و الحمد لله هالمرة طلعنا كتير :)
بالعاده بنطلع بس كوفي شوبات وبالليل
هاد اللي بنلحق نعمله بالكم يوم بين ما تيجي العيله تسلم و بعدين تيجي العيله تودع :$

وزي ما حكيتي بس يسألني اخوي وين نروح, كأني عمري ما طلعت ولا بعرف مكان منيح :)

Rula A. said...

شكلو الكل قارئ على نفس الشيخ.. أديش بحكي إنو خلينا نشطح ليوم بحدائق الحسين.. الجواب بكون ياوردي إليوم جمعة يعني كل الدواوين معسكرين هناك..
لا بس ما شاء الله الصور كتير حلوين.. أنا كتير بحب الربيع في الأردن :)
أهم اشي تكونو إنبسطو :)

SimSim said...

Ahmad: then u should come for a visit these days :D

Whisper: يتحسي وهمه موجودين الوقت قصير صح ؟؟ وشكله لازم نعمل دليل سياحي للأردن طبعا مش كله فنادق هههه

Rula: هههه لازم نوجد طريقة يغيروا فيها رأيهم !! كتير انبسطنا والله مع انه كان وقت قصير

krmoosha.. said...

ياااااااااااااااااه

ذكرتيني بأيام ارحلات المدرسيه

عنجد بشتاق للربيع بعمان كثييييييييير

نيالكم...

صحيح عنا هون حدائق وبحر وجو حلو بالشتا بس زي طبيعة عمان بهالوقت مافي...