حوار دواوين أو حفرتلية مش عارفة بالضبط - على هامش شريط كاظم الجديد

يعني انا لا أصنف نفسي من الحفرتلية بس اللي بطلع مع شوفرية التكاسي في هالبلد لازم يوخد كورس مجاني الزامي لكل فرد أردني .... المهم من أكمن يوم كنت بحكي مع بنت عمتي حوار بنات عادي عن الشغل و الحياة .... ما شفت الا ابن عمتي شلف (أخذه بقوة) التلفون منها و دار الحوار التالي

ايمن: اسمى سمعت شريط كاظم الجديد ؟
اسمى (سمسم) : لا و الله لسه بس سمعت انه بجنننننن ( مسجات و ايميلات من كل انحاء العالم بتسألني و يتخبرني سمعتي الشريط ولا لسه) لسه بدي اسمعه

ايمن: اسمى اسمعي مش شريط !!!! شو هاذ !!! حريقة ... اشي دمار ... مش كلمات مش ألحان .... مش طبيييعيييي

اسمى: كيف يعني احكيلي كلمات من اغنية - طبعا انا مغمى عليه ضحك من أسلوبه بالحكي

ايمن: مش متذكر هسه ! بس اسمعي شغل بس تجيبي موس عالصبح و تسمعي و تشطبي حالك اسمعي اسمى جد جد مش طبيعي في أغنية يوميات رجل مهزوم بحكيلك فيها ****** نسيت بس المهم عالوجع يا اسمى

اسمى : طب سمـّـعني لحن ولا اشي جملة مفيدة

ايمن: و عرظ خواتي انه من الآخر خلص انت بس اسمعيه و ادعيلي

اسمى: طب انت ليش بتحكي هيك من ايمتى صاير شغل دواوين ؟ لونّي ما بعرفك بشك اني بحكي مع شوفير تاكسي

ايمن: لا و الله بس شغلي الجديد بده طنطات و ناس مرتبين و خايف يأثر على

أخلاقي فا بدي أعمل توازن

رجعت أحكي مع بنت عمتي و بعد شوي رجع شلف التلفون و صار يسمعني بأغنيةمن أغاني كاظم الجديدة

.

طبعا انا رغم حبي الشديد لكاظم بس عمري ما اشتريتله شريط أو سي دي دايما بيجيني هدية بس شكلي رح اشتريه هالمرة بس لما ترجع السيارة من الكراج و يكون عندي وقت اسمعه على رواق