Monday, March 15, 2010

بنت بين شباب

في كتير اشياء أثرت فيه لاني تربيت مع اخواني الشباب الله يسعدهم

أ
ول شيء تعودت اني آكل بسرعة لانه ما شاء الله الشباب سريعين بالأكل يعني لو على العشا مثلا بدي لسة أفكر شو بدي آكل أو آكل بنعومة وببطء (زي البنات بشكل عام هههه) لازم أحضر عشا لوحدي لانه الأكل معهم متل السباق هههههه

تعلمت أدافع عن نفسي مش انهم لا سمح الله بمدوا ايدهم علي !! بس مزح الشباب دفش !!!! يعني بده يربت على كتفي بخلعه وبطير من قوة المزحة ههههه .... وبطريقة ما كبرت عندي قوة شخصية أكتر من أي بنت تانية يمكن من الثقة والحرية اللي كانوا يعطوني اياها ولا زالوا

الحمد لله انه علاقتنا حلوة يعني بنفضفض لبعض كتير عشان هيك نوعا ما صرت أعرف طريقة تفكير الشباب وبعرف أنصح البنات في بعض المواقف

البنت اللي بتكبر بين شباب يا بتطلع دلوعة كتييييير يا مسترجلة شوي .... وأنا صغيرة كنت أحس حالي شوي متلهم وأتصرف زيهم بس الحمد لله اني لحقت حالي على كبر ههههه

كتير بحب سهرات البنات وبحس انها حدث مهم .... بيت عمتي كله صبايا لما أروح عندهم جد بكيّف انه هيك بنات وجو لطيف ومواضيع غير وقصص

أحلى شيء لمن أطلب اي شيء بخطر على بالي مش لسه بفكروا يجيبولي اياه أو لأ ! بكون عندي على طول .... عشان هيك ما بحب حد يردلي طلب وهدا اشي سيء صراحة

بخلوني على معرفة أول بأول بكل تكنولوجيا جديدة سواء تلفونات أو كمبيوترات أو الالعاب بس مرات جد بحس حالي ضايعة بينهم وملخومة هههههه (شو بحكوا هدول؟) وأوكي عندي معرفة بس ما عرفوا يخلوا عندي الاهتمام يعني الموبايل بضل معي سنتين وما بهتم أجدده (خليه مدام بيلقط هههه) مش متلهم

طبعا تعلمت أكون مضيفة جيدة لانه ما شاء الله أصحابهم !! يعني سويلنا شاي سويلنا قهوة .... ما في اشي زاكي ؟ وهلمّا جرا

بس الاشي الوحيد اللي بجادل أبوي فيه لهسه انه ليش كان ياخدني معهم كمان على الحلاق ؟!!!! Photobucketيلا بالمرة !!! رايحين رايحين


مشان هيك دايما كنت على الزيرو شعري لحتى صرت 5 سنين شكلي طالبت بهويتي و تمردت وصاروا يطولولي اياه (وكمان 99% من صوري مع اولاد)

طبعا كبرنا واللي تزوج واللي مسافر يشتغل (الله يوفقهم) بس أكتر اشي بزعلني البعد يعني جد بتمنى الايام اللي كنا كلنا مع بعض ترجع ! بيجو زيارات وبشوفهم ودايما على اتصال بس مش زي زمان وجد هدا شعور سيء جدا

ومع اني تربيت بين شباب الله يحميهم بس الي اخوات لكن تزوجوا وانا صغيرة وكنت البيبي سيتر لأولادهم لحتى صرت 18 سنة مرحلة التمرد التانية ههههه بعدها صرت أفيع معهم وأعرفهم منيح

الله يسعدهم كلهم وين ما كانوا

مس يو أوووول جايز

24 comments:

Whisper said...

اسأليني انا عن البنت بين شباب
انا البنت الوحيده بالبيت بين 4 شباب و من الاحجام الكبيرة ما شاء الله
اقصر واحد من خواني 185 سم

ضليت العب جلول و مسدسات و طابه و سبع حجار و انط من فوق الخزانه وحالة
لانتبهتلي ماما وانا 6 سنين كأنه,ومن وقتها هديت و بالعكس قلبت كتير ناعمة :$
لكن هاد ما منع اني بس بديت اتحكم بلبسي, بطلت البس اشي اسمه تنورة او فستان لأشتغلت :)

لكن وقت الجد تعالي شوفيني, مرة بابا سمعنا بنحكي بصوت عالي فأجا يدافع عني, لقاني مكومتهم كلهم فوق بعض
:)

و برضة موضوع اللي بتطلبيه فورا بصير موجود هاد عنّا, خربو اخلاقنا الله يسامحهم :)

قربهم مني خلاني اكون جاهزة لاي شي ممكن اواجهه بالجامعه و الشغل خصوصا

الله يديم المحبة بينكم يا رب و بينا انا واخواني

في اشي كتير بحبو الو سنين بصير
كل زيارة لدبي بكون في اغنيه لحد جديده نازلة عالسوق و بتصير هاي الاغنية اغنيتنا
و كل ما يسمعوها عالراديو يتصلو فيي يسمعوني جزء و يسكرو الخط انهم فكرو فيي وقتها
هالسنة اغنية حسين الجسمي "6 الصبح"


سامحيني عالبوست قصدي التعليق الطويل بس انفتحت قريحتي عالكتابة...حظك :$

مياسي said...

ممم زكرتيني بحالي

بس انا مش وحيده انا الكبيره وضليت هيك على 4 شباب شي 8 سنين تا اجت اختي

بس شغله الدلال هاي مش كتير موجوده يعني انا اللي دايره بالي عليهم مش العكس

بس شخصيا حاليا مليت من الشباب وكل عيشتهم

خصوصا انو صار لي 10 سنين عايشه معاهم ومع اعمامي الصغار بالبيت

جد بيكفي

Rula A. said...

:) ياه رجعتيني لأيام الطفولة..

أنا أصغر وحده بالعائلة.. ترتيبي رقم ٦ وأخوي قبلي.. بينا سنة و ٤ أشهر..
فلما كنا صغار كنت دائماً العب مع أخوي وإبن خالتي إلي أصغر من ب ٣ سنين .. استغماية.. بوليس وحرامي.. ونطنطة هون وهناك :)
لهلأ لسا بنلعب استغماية لما نجتمع انا وأخوي وإبن خالتي وأولاد عمي ..
ولحدية اليوم لسة بنلعب أنا وأخوي مصارعة حرة هههه..

أن وأخوي كتير صحاب.. حتى لماً واحد فينا ينهبل ويسوي مصيبة التاني بغطي عليه .. وإبن خالتي إلو معزة خاصة ماهو صديق الطفولة :)

الله يخليهم ويديم المحبة :)

عـلا - من غـزة said...

عاد انا طول عمري نفسي يكون عندي اخوة شباب اكبر مني (على الاقل لو واحد) عشان قصة الصحوبية مع الاخ الكبير هادي .. حاساها علاقة كتيييير مميزة :)

اخويا الصغير اصغر مني ب شي 6 سنين مثلا .. ومن فترة قريبة بديت احسه كبر لما دخل الجامعة :)

بس الصور لوووووول عالآخر :D:D:D:D

تحياتي :)

Genki Dama said...

God bliss you all =D

SimSim said...

Whisper:

هدول نفس المقاسات اللي عنا ما شاء الله هههههه

انا بتذكر في الي صورة مع اخواني وولاد الحارة هههههههههه كنا نلعب زكوظة هههههههه

هههههه عجبتني مكوميتهم فوق بعض ... بتعرفي بحس جد شخصية البنت بتصير أقوى يعني من وهي صغيرة بتكون تطابش مع شباب

كلامك صح وجد تأثرت طريقة تصرفنا مع الكل حتى انا هيك بحس ....
شغلة الأغاني هاي خاصة بيني وبين اخواتي .... ما بقصروا
:D
وبعدين البيت بيتك قصدي البوست بوستك اكتبي اللي بدك اياه يا عسل
:)

الله يحميكم كلكم ويخليلكم لبعض

SimSim said...

مياسي:
انا كنت أصغر وحدة بالبنات وفي شاب اصغر مني بس دائما كان ابوي يحسسني اني اصغر وحدة والمدللة يمكن عشان كان يشوفني بطابش بينهم

:D
شو تملي ؟!! لسة كمان شوي بتتزوجي وبتجيبيلك ولدين تلات وبنت وحدة هههه ما في مجال للملل

SimSim said...

Rula:

هههههههه مصارعة حرة ؟!! انا كنت بس حد يقرب علي أهرب بسرعة عشان هيك طلعت كتيير سريعة بس مش قادرة أتخيلك بتلعبي مصارعة حرة !! ما بغلبوكي دائما ؟ ههههه
صحبتهم جد حلوة ومميزة

تسلمي يا رب والله يخليكم لبعض ويسعدكم

:)

SimSim said...

علا:

هي بصراحة لا تعوض انه هيك أخ كبير تحسي دايما انه سند الك وداير باله عليكي بس أخوك الصغير استني عليه سنتين بصير يحس حاله زلمة وبعمل أخ كبير تخافيش

يعني رح يعوضك

:D

SimSim said...

Haytham: thaaaaanx

Qwaider قويدر said...

كأنّك بتحكي عن ميوش و انا مش عارف؟ عندها نفس كل شي! بس الحق يقال اخت رجال
بس نبّهتي لموضوع مهم جدا... قوة الشخصية. يعني البنت لازم تعرف تكون قد حالها. ايّام النعومة و الخجل (و كله مطلوب طبعا بس في المكان و الزمان المناسبين) ولّت. هالأيّام بيتّاكل حقّهم اللي ما بيكونوا قد حالهم

Shaheen said...

في البداية بحب ابدي تعاطفي الشديد مع صاحب النصيب لانه كل افلامه رح تكون محروقة على مين يابا ؟ بدك تضحك علي ؟ انته الشباب عارفكم
لووووووول

الله يخليكم لبعض

Shaheen said...

whisper keaf 7alek , keaf rdaki 3alena?
bala ma nakol kaf sa3t hal masa

SimSim said...

Qwaider: صدقا بنمي قوة شخصية عند البنت بس لما يكونوا اخوانها كويسين ومعطينها الحرية ومش واقفين لكل تصرف بتتصرفه زي الحسيب والرقيب

كيفها ميوش ؟ الها وحشة ! ان شاء الله تكون كويسة

SimSim said...

Shaheen: هههههههههه عن جد ضحكتني !!! هو هالحكي فيه منه ليش الكزب بس مش كتير حرام ههههه

Whisper said...

@ Shaheen LOOOL, yalla sama7 ellyeleh Allah yerda 3aleek :D

hommeh ya 7aram la2enhom mesh 2adreen y9ebonee 5ososan 2enno law mesko 2edy b2weh fawran ya bteltawy ya bet9eer 2alwan, ana basta3'el elmawdoo3 :)))

Texan in UAE said...

simsim! long time no see. (((hugs))) I need to learn to read arabic... bad me. Those pictures are tooo cute! can you tell me who they are? come visit!

SimSim said...

Texan: yes u have to learn arabic ! and we will help u :D I am just talking about how it is to be a girl raised with boys and how it effected me ! in the first picture me with 3 of my brothers and the second one also me with Dad and other brothers :D may allah protect them !

glad to see u here and sure I will be visiting u always :)

Texan in UAE said...

Ameen!!!! masha'a'Allah! so cute! I am sure it was something to be raised with all boys. :D A bit of an experience. masha'a'Allah. May Allah always keep you and your family safe ameen

((((hugs)))) hope to see you around my blog. I will insha'a'Allah learn to read arabic. Ya RUBB.

SimSim said...

Texan: thanx sweetie .... and as u said it is amazing and i loved each minute of it :D and still

sure I'll stay around and if u need any help in Arabic just let me know :hug:

سراج الماضي said...

أنا عكسك تقريبا
أنا شب وحيد على خمس بنات
وفي الوسط كمان
المشكلة يا بتطلع مدلع يا بتطلع متمرد
وأنا الثاني
هو أكيد بيكون في دلال ومحابة للولد بس أمي بالذات ما كانت تفّرق ، أبوي لأ المغاوزة عيني عينك :)
كمان مشكلة الوحيد كشب وراه مسؤوليات كثيرة
خصوصا لما الخوات يتجوزا ، زيارات وطلة العيد و معايدة الصغار و الكبار
كمان الوحيد بتلاقوا علاقاته بصحابه قوية كثير عشان ما عنده أخ

الله يحفظك لأهلك و يخليلك أخوانك ويرجعهم دائما سالمين

أنا بتفهم شعورك تماما لما بتحكي أنك بتفتقدي تحكي معهم ، خصوصا لما نبلش نكبر شوي والحياة تاخذنا كل واحد في طريق، بتصير قعدة صفا بتسوى الدنيا واللي فيها ، والمشكلة مرات كثير بيصير صعب انه يتجمع الكل مع بعض إذا في منهم متغربين

krmoosha.. said...

احلى اخت والززززز كرمووووشه عنااا

SimSim said...

سراج الماضي:

سبحان الله كل واحد بتأثر بشغله لكن التأثير بكون للأفضل ان شاء الله

الله يخليكم لبعض وتضل تزورهم وتوجّبهم

SimSim said...

karmoshtee: والله انت اللي ألز وحدة

زمان ما حكينا مع بعض ؟!!؟